Sport leer vaardighede en lewenslesse
Ek het nog altyd plesier en vreugde in verskeie sportsoorte gevind. Daarby het ek ook vaardighede ontwikkel, lewenslesse geleer en nuwe insigte gekry. As ma het my rol van aktiewe deelnemer na toegewyde toeskouer verander. Die emosionele hoogte- en laagtepunte is egter steeds ewe intens.
Verskillende sportsoorte vir verskillende mense
Ons het ons kinders aangemoedig om aan ten minste een sportsoort deel te neem. Die vermoë om te leer speel binne die reëls van ‘n spel, is ‘n lewensvaardigheid wat op baie aspekte van die lewe van toepassing is.
Switserland se skolesportkeuses verskil van dié van Suid-Afrika. As ‘n beginner het Zander nie dieselfde vaardigheidsvlak in sokker, as sy maats wat van kleintyd af gespeel het, gehad nie. Sy balvaardighede was goed genoeg as doelwagter, maar die situasie was nie goed vir sy selfbeeld nie. Gelukkig het vlugbal as ‘n opsie na vore gekom en die sport het Zander soos ‘n handskoen gepas. Hy het by ‘n vlugbalklub in Zürich aangesluit. Dit het sy vaardighede verbeter en hom ook met sy Switserse Duits gehelp.
Jacques het vroeg in sy lewe sy passie in krieket gevind. Christo se passie vir tegnologie het sy belangstelling in sport vêr oortref. Op die rugbyveld was hy die een wat wawiele gedoen het. Ons het hokkie voorgestel en gelukkig het hy sy entoesiasme en motivering in die gees, pret en spanwerk gevind.
Sport leer vaardighede en lewenslesse
In die lewe, net soos in sport, vind ons nie altyd dadelik die plek waar ons die beste weergawe van onsself kan wees nie. As ons aanhou soek en probeer, sal ons die geleentheid vind wat by ons sterkpunte en passies pas. Sport leer ons die waarde daarvan om ‘n vaardigheid te verfyn. Dit verhoog ons doeltreffendheid as atlete, maar gee ons ook die geleentheid om die vervulling wat voortdurende verbetering bring, te ervaar.
Tyd- en energiebestuur
Sport leer ons op ‘n praktiese manier meer oor tyd- en energiebestuur. Om ‘n vaardige speler in enige sport te word, verg aansienlike beleggings van tyd en energie. Dit vereis toewyding en effektiewe prioritisering. Om tyd te maak om te oefen, vereis dat ons vrye tyd moet opoffer. Dit leer ons om te onderskei tussen wat noodsaaklik is en wat ons moet laat gaan.
Spanwerk
In spansport vereis uiteenlopende posisies verskillende vaardighede. Spanlede leer om mekaar se sterkpunte te benut en hoe om vir swakpunte te vergoed. Die span se sukses hang af van sy minste vaardige speler, wat die belangrikheid van wedersydse bystand, ondersteuning en aanmoediging beklemtoon. Elke lid het ʼn verantwoordelikheid teenoor die groep en moet verseker dat hulle in top kondisie is, hul vaardighede slyp en hulle beste prestasie tot die span se gesamentlike voordeel lewer. In die breër samelewing vorm ons almal deel van verskeie spanne by die huis, skool, werk, kerk of binne ons gemeenskappe.
Risiko’s en geleenthede
Om sukses in sport en die lewe te behaal, vereis dat ‘n speler geleenthede raaksien en berekende risiko’s neem. Soms is ons wenners, maar ander kere is terugslae onvermydelik. Dit is van kardinale belang om sukses met nederigheid te verwelkom en nederlaag met waardigheid te aanvaar. Ons moet leer om terugslae te hanteer en nie daardeur verlam word nie. Dit is ‘n integrale deel van persoonlike groei.
Terugslae
Beserings en foute is inherent aan beide sport en die spel van die lewe. Dit beïnvloed ons selfvertroue en geestelike welstand. Om van terugslae te herstel is ‘n tydsame proses. Gedurende sulke uitdagende tye is selfversorging en die ondersteuning van familie en vriende belangrik. Om onsself die nodige tyd vir herstel te gun, is noodsaaklik om ons te help om na die speelveld met hernieude krag, passie en entoesiasme terug te keer.
Gebalanseerde leefstyl
Sukses in sport is afhanklik van die handhawing van ‘n gebalanseerde leefstyl. Ons moet met toewyding oefen en aan kompetisies deelneem, maar verseker dat ons ‘n lewe buite sport ook het. Hierdie balans is noodsaaklik ten einde te verhoed dat ons ons vreugde in sport en die spel van die lewe verloor.
Die speeltyd op die veld is beperk
Tyd op die veld is beperk. Voordat jy dit weet, verskuif jou rol van aktief deelneem na mentorskap en leiding vanaf die kantlyn. Van daar af bied jy raad, ondersteuning en aanmoediging.
As ‘n ouer op die kantlyn, is dit belangrik om te onthou dat kinders die beste leer deur aktief aan sport en die lewe deel te neem. Daarom is laat gaan ‘n deurslaggewende deel van ouerskap. Ons kinders het die vryheid nodig om te ontdek wat hulle geniet, watter strategieë die beste vir hulle werk en hoe om uit hul foute te leer.
Groete
Emsia