Ons het in Desember ‘n wonderlike geskenk van ons familie ontvang.  Andre, en my sus Ansa het dit vir hulle kinders, Marga en Altus, moontlik gemaak om by ons in Zurich vir twee weke te kom kuier. Hulle wens was om hul kinders se perspektiewe en ervarings te verbreed. Vir ons was dit ‘n voorreg om ons wêreld en Kersfees met familie te deel.

Marga en Altus se besoek was propvol eerstes. Dit was hul eerste keer wat hulle gevlieg het, hul eerste reis buite Suid-Afrika, en hul eerste ervaring met sneeu. Die sneeuval was ‘n groot seën wat ons almal saam geniet het. Die lang nagte, koue dae en die verskillende Europese tale, was nuwe ervarings vir hulle. Kortom, hul besoek was ‘n buitengewone avontuur.

Om ’n beter begrip van hulle reiservaring, indrukke en impak op hulle toekomsvisie te kry, het ek hulle gevra om sekere vrae te beantwoord. Ek deel hulle terugvoer in die brief.

Wat was jou hoogtepunt ervaringe wat deel van jou herinneringe vorm?

Marga – Die sneeu was vir my die hoogtepunt. Dit is magical en iets wat mens altyd oor droom. Dit is egter eers as jy dit in persoon ervaar, wat mens besef hoe “wow” dit werklik is. Die rondloop in Zurich en die besoek aan die Franse kant was vir my persoonlik ‘n eye-opener, Ek het die pragtige winkels, lekker kosreuke en die mooiste liggies wat gemoedere opvrolik, geniet.

Ek swot toerisme en die besoek aan die Dolder Grand Hotel was vir my ‘n belewenis. Die plek is prentjiemooi en het my met my studies aangemoedig en my passie op ‘n nuwe vlak aangehits.  Ek kon werklik ‘n droom van myself wat in die Dolder Hotel werk, sien.

Altus – Die sneeu was vir my ‘n ongelooflike ervaring en beslis die vakansie se hoogtepunt.

Sal jy na ander lande wil reis en waarom?

Marga – Ek sal verseker na nog lande wil reis as ek die geleentheid kry. Ek het ‘n passie vir reis, verskillende kulture en verskillende maniere van dinge doen. Ek stel veral belang in hoe hotelle funksioneer en het ‘n diep waardering vir hul skoonheid, elegansie en uniekheid.

Altus – Dit was vir my ʼn besonderse ervaring gewees om ander kulture te ervaar. Ek sal dit graag weer wil doen.

Watter lande is op jou reis wenslys en wat hier interesseer jou?

Altus – Ek sal graag Parys in Frankryk, Mauritius, Amerika, Swede en Tokio wil besoek. In Parys wil ek die Eiffeltoring sien en ervaar. Mauritius lok my met sy pragtige see en fassinerende kultuur. Amerika se kultuur voel bekend, soortgelyk aan Suid-Afrika s’n, en al sien ons dit gereeld op televisie, wil ek dit persoonlik ervaar. Swede is van kleins af op my wenslys. Tokio is bekend vir sy motors, unieke kosse en kultuur en aangesien ek van motors hou, sal dit die hooffokus van my reis wees!

Marga – Die mode, asook die mengsel van geskiedkundige en moderne argitektuur in Milaan, Italie, is graag iets wat ek self wil sien. Ek is mal oor die Franse kultuur en sal baie graag dit self in Frankryk wil beleef. Tulpe is my gunsteling blom en wanneer ek selfs net n bossie in die winkel sien, raak ek kinderlik opgewonde. Daarom sal ek graag Nederland wil besoek om die velde vol tulpe en ander kleurvolle blomme te ruik en bewonder.

As jy soos ons na Switserland moes verhuis, wat van so ‘n ervaring sal jy geniet en wat daarvan jy uitdagend vind?

Altus – Ek is mal oor melk en kaas en sal dus maklik by die Switserse koskultuur aanpas. My familie kom egter altyd eerste en dit sal vir my die ergste wees om hul agter te los.

Marga – Ek sal dit geniet om so vryklik met publieke vervoer te kan rondgaan en nuwe plekke te besoek. Ek sal dit ook geniet om nuwe goed in my nuwe tuisdorp te ontdek soos die melkery naby aan my Tannie-hulle se huis waarby mens varsmelk in jou eie bottels kan gaan tap vir gebruik. Die mooi woude en vriendelike boere in die omgewing sal my bekoor.

Wat vir my wel uitdagend sal wees, is dat my familie so ver van my af gaan wees.  Dit sal moeilik wees om nie in my moedertaal te kan praat nie.  Ek is baie lief vir mense en om praatjies te maak maar in Engels of selfs ander tale sal dit baie uitdagend wees. Die verskriklike hoë lewenskostes sal vir my ‘n groot aanpassing wees aangesien Suid-Afrika eintlik in baie omstandighede nog bekostigbaar is (al voel dit nie aldag so nie).

In watter opsig het die Switserse besoek jou met meer waardering na Suid Afrika laat kyk?

Marga – Alhoewel die sneeu ʼn mooi prentjie was, het ek die Kalahari sonsakke verskriklik baie gemis. Ek het tydens ons besoek my familie en vriende baie gemis en het nuwe respek gekry vir mense wat oorsee verhuis.

Terwyl ek in Switzerland was, het die Kalahari boere deur  ʼn strawwe droogte gegaan. Gedurende die laaste week van ons besoek het dit in die Kalahari begin reën en ek kon nie wag om die groen gras en positiewer boere te sien nie.

Altus – Ek het my biltong, droëwors en die heel belangrikste, braaivleis, baie gemis. Ek kyk met nuwe waardering na my eie die kultuur en mense wat my taal praat en verstaan. Die kosbaarste van alles is die Kalahari sonsak met n jakkals wat vêr in die agtergrond skree.

Ek deel meer oor ons gesamentlike ervaringe in die video hieronder.

Ons tyd saam was besonders en het ons familiebande versterk.  Daar was heelwat oomblikke en ervaringe wat in die toekoms stories sal word wat ons om braaivleisvuur of ‘n pot kaasfondue sal deel. Ek wonder nogal wat Zander se antwoorde op die vrae sou wees as hy twee weke oor Kersfees in die Kahalari sou kuier?

Groete

Emsia