Verandering ontwikkel ons veerkragtigheid

Verandering ontwikkel ons veerkragtigheid

Verandering is iets wat ons almal gedurende ons lewens sal ervaar. Ons ervaar veranderinge in ons werk, verhoudings, gesondheid, gemeenskap en die wêreld. Soms beplan ons ‘n verandering en is ons bewus daarvan dat ‘n verandering gaan plaasvind. In baie gevalle verskyn die verandering egter onverwags voor ons deure en verras ons.

Ons vermoë om verandering positief te hanteer, word veerkragtigheid genoem. Op die sportveld bepaal jou fiksheid hoe vinnig jy herstel ná intensiewe oefening. Op dieselfde manier sal jou veerkragtigheid bepaal hoe effektief jy geestelik en emosioneel sal herstel ná lewensveranderende gebeure. Gelukkig kan ons ons vermoë om verandering te hanteer oefen en verbeter.

Verandering het fases

Volgens kenners bestaan ​​verandering uit drie fases. Die eerste fase is afhandeling, afskeid en afsluiting met gepaardgaande verlies en verligting. Tweedens is die tussen-fase, soos die sweefstok kunstenaar in die sirkus wat die sweefstok aan die een kant los, maar onseker is of die sweefstok op die regte tyd en plek aan die ander kant sal wees. Die derde fase is die nuwe begin. Dit bring gewoonlik ‘n element van opwinding maar ook die onsekerheid of jy die nuwe uitdaging kan hanteer.

Refleksie op my eie lewensveranderinge

Verlaat die nes

My eerste betekenisvolle verandering was toe ek my ouerhuis ná skool verlaat het. Die afstand en aanpassing by koshuis- en universiteitslewe het my op baie maniere uitgedaag. Aan die einde van my eerste jaar was ek 15 kg swaarder en al my nuwe klere te styf. Elke keer as ek moet aanpas by verandering as ‘n volwassene, verskyn ek as ‘n verwarde student in my drome en weet nie wat aangaan of watter klas ek moet bywoon nie. In my drome het ek baie universiteite wêreldwyd besoek as ‘n verwarde en onseker student.

Werk in Londen

Ons het as jong volwassenes in Londen gaan werk. Hierdie aanpassing was op ʼn volgende vlak en ek was uit my diepte. My grootste probleem was dat ek nie behoorlik Engels kon praat nie. Boonop was die stadslewe en die grys weer vir my as Kalahari-kind aansienlike aanpassings. Londen het my egter gehelp om myself beter te leer ken en my deursettingsvermoë en veerkragtigheid te verbeter.Ek vertel meer oor my ervaring in Engeland in my brief getiteld Taaltameletjie.

Egskeiding en hertroue

My aanpassing as ‘n geskeide vrou met twee klein seuntjies was uitdagend op ‘n praktiese en sosiale vlak. Ons het mettertyd ‘n nuwe roetine gevind, en ek het nuwe huis- en tuinonderhoudsvaardighede aangeleer. Ons het net begin gemaklik raak in ons nuwe roetine toe Charl deel van ons prentjie begin vorm. Charl se aanpassing was enorm, want hy moes skielik twee seuns help grootmaak al het hy nog nooit in ‘n huis met kinders gewoon nie. Hy het nie die vaagste benul gehad waarvoor hy homself ingelaat het nie.

Verhuising na Switserland

Aanpassing in Switserland is ons mees onlangse groot verandering. Ek het in my brief oor Leefstyl veranderinge in Switserland meer daaroor gedeel. Ek weet wel dat elke verandering en aanpassing wat ek met tyd moes maak, het my help voorberei het vir die aanpassing in ‘n nuwe land.  Wie weet watter veranderinge in die toekoms op my wag?

Veerkragtigheid gedurende verandering

Ek het geleer dat die volgende help met veerkragtigheid terwyl ons deur verandering gaan:

  • Identifiseer die aspekte waaroor jy wel beheer het. Dit is maklik om verstrengel te raak in die baie situasies wat jy nie kan beheer nie. Dit is dus van kritieke belang om geleenthede te soek om jouself te bemagtig om aan verandering te werk.
  • Sien verandering as ‘n geleentheid. Veranderinge laat jou toe om jou prioriteite te heroorweeg. Jy kan besluit hoe om jou tyd te spandeer en wat vir jou belangrik is.
  • Wees jou eie beste vriend en sorg goed vir jouself. Dit is normaal om emosioneel te voel tydens verandering. Dit is nodig om geduldig met jouself te wees en met bewustheid te leef. Jy moet oor jou denkpatrone reflekteer en rasionele denke verseker. Beide roetine en gereelde fisiese oefening het ‘n positiewe impak.
  • Praat met iemand. Wanneer jy al jou baie gedagtes aan iemand probeer verduidelik, help dit met jou perspektief, en voel jy ligter. As jy nie gemaklik is om met vriende of familie te gesels nie, is jy welkom om my te kontak as onafhanklike coach. 

Sterkte as jy besig is om met verandering te stoei.

Groete

Emsia

Musiek praat die taal van my siel

Musiek praat die taal van my siel

Musiek praat met my siel op maniere wat selfs woorde nie kan bereik nie.  Ek self het nie baie musiektalent nie. Pa het in ʼn orkes gespeel en beide my ma en suster is met suiwer nootvaste sangstemme geseën. Ek het egter in die musiek waardering ry beland toe talente uitgedeel is, maar daarvan het ek gelukkig mildelik ontvang.

Liedjies vertel stories van mense, plekke en tye

Tydens my kinderjare het daar altyd musiek in ons huis gespeel.  Daar was ʼn radio in elke vertrek, selfs in die badkamer.  As tieners het ons ons gunstelingliedjies van die radio af op kassetbande opgeneem. Ons het vir my ma ‘n lys van liedjies gegee wat sy moes opneem terwyl ons op skool was. My suster het die woorde van elke gewilde treffer geken, en ek het maar my eie woorde uitgedink

Met my ma se 70ste verjaarsdag het ek ‘n CD-stel van haar 40 gunstelingliedjies as geskenk saamgestel. Sy het liedjies gekies wat verteenwoordigend is van al haar lewensfases en vir my die storie agter elkeen vertel. Tydens haar verjaardagviering het sy kopieë van die CD’s aan haar vriende en familie uitgedeel. ’n Besondere liedjie op die CD wat my na aan die hart lê, is die Māori Love Song. Sy het vir my vertel dat daardie liedjie net na my geboorte in die kar op pad huis toe op die radio gespeel het.

Ek het vir myself ook ‘n Top 40 iTunes trefferslys saamgestel en liedjies gekies wat my aan mense na aan my herinner. Ek luister elke Donderdag daarna as ek die huis skoonmaak en dan kuier my siel by almal terwyl die liedjie wat ons verbind speel.

Musiek is die taal van die hart

Musiek het ‘n fisiese, emosionele en geestelike impak op ons. Dit het die krag om ‘n hele verhoog opgewonde te maak en te vermaak, maar kan ook strelende gemak verskaf. Filmvervaardigers gebruik dit baie goed om emosie en gevoel te skep terwyl die plot ontvou. Mense vertel stories deur musiekblyspele, jazz, rap en opera. Musiek is ‘n medium vir aanbidding en lofprysing in kerke. Dit vorm ook deel van kultuur en volksmusiek om mense ‘n gevoel van eenheid te gee.

Musiek in Switserland

Musiek speel ‘n belangrike rol in die Switserse kultuur. Vele geleenthede bestaan ​​om musiektalent te ontwikkel en uit te leef. In die somer is daar een keer per week ’n orreluitvoering in Zürich se moederkerk (Fraumünster). Verskillende kerkorreliste kan hul talent op die indrukwekkende orrel in die historiese Gotiese gebou deel. My siel is in die hemel as ek na suiwer orrelklanke luister.

Gedurende die somer is daar baie musiekfeeste en konserte. Daar is buitelugkonserte waar mense piekniek kan hou terwyl hulle na simfoniemusiek langs die meer luister. Ons het die Lusern Musiekfees in die groot (KKL) konsertsaal in Lusern bygewoon. Ek en Zander het ‘n Star Wars-fliek op ‘n groot skerm gekyk terwyl ‘n lewendige simfonieorkes die klankbaan verskaf het. In Desember beplan ons om die 007 Sky Fall fliek met lewendige musiek te ervaar.

Die Alphorn is ‘n tradisionele Switserse musiekinstrument. Jare gelede het die skaapwagters dit gebruik om koeie uit die weivelde te roep wanneer dit tyd was vir melk. Later het hulle die Alphorn vir volksmusiek en toerisme gebruik, en nou het dit ‘n nasionale simbool geword. Ons ontmoet dikwels ‘n persoon of groep mense wat hierdie Alphorn by toeriste plekke speel.

Ek hou van Plato se woorde:

Music gives a soul to the universe, wings to the mind, flight to the imagination and life to everything.

Groete

Emsia

As jy die gevreesde oproep ontvang

As jy die gevreesde oproep ontvang

Op 13 September 2020 het ons daardie oproep gekry wat almal gevrees het. Dit was die oproep om ons in te lig dat Justin, ons nefie en Candice se broer, se lewe hier op aarde, op die ouderdom van vyf-en-twintig geëindig het. Hy sou op die 14de ‘n nuwe werk begin het. Justin en Candice is soos ons eie kinders. Charl het elke week met Justin gesels om sy vreugdes en sy laste te deel.

Die kaarte wat die lewe aan ons uitdeel

Ons het nie ‘n keuse oor die kaarte wat die lewe aan ons uitgedeel het nie. Al waaroor ons beheer het, is hoe ons ons hand van kaarte speel. Justin het ‘n onmoontlike hand van kaarte gekry en het in sy kort lewe baie uitdagings in die gesig gestaar. Hy en Candice het op laerskool hul pa aan Motorneuronsiekte verloor. Hy het egter altyd elke lewensuitdaging met hoop en nuwe moed aangepak. Sy deursettingsvermoë was inspirerend.

Justin was ‘n aantreklike en lang jong man met ‘n pragtige glimlag wat hy saam met hom gedra het, ten spyte van die lewe se uitdagings. Hy het altyd probeer om die lewe vir ander beter te maak en was liefdevol en beskermend teenoor Candice. Hy het die meeste van sy tyd in die gimnasium deurgebring en sy gimnasiumvriende was soos familie. Die Covid-19-inperking het hom van sy tyd in die gimnasium ontneem, wat sy gesonde ontsnapping en manier van sosialisering was.

Ons het herinneringe gedeel

Ons het ‘n Zoom-herinneringsessie vir Justin gehad weens Covid-beperkings. Familie en vriende wêreldwyd het die geleentheid gehad om herinneringe te deel. Dit was die eerste keer dat die Goosen-gesin in ‘n baie lang tyd saam was, en dit was so goed om mekaar te sien. Dit het amper gevoel of ons almal gemaklik in een groot sitkamer sit en oor Justin praat. Die eerlikheid van sommige van die stories het ons deur ons trane laat lag.

Vriende se woorde

Dit was ʼn voorreg om met die besonderse vriende in Justin se lewe te ontmoet.  Hulle het die mooiste foto’s, stories en woorde gedeel.  Sy meisie Trish, het tydens die sessie ‘n roerende brief voorgelees oor die impak van sy lewe en liefde op haar.

ʼn Vriendin uit hulle Polekwane kinderdae, het die volgende gedeel:

“I remember how Justin, Candice and I sat on the trampoline and ate sweet chilli chips. This afternoon I went to buy a pack of sweet chilli chips at our South African shop. I ate everything by myself. We spent so much time together as children. I cried like a baby when we moved to Australia! They were like my brother and sister xxx.”

Ander jeugvriende het kosbare verjaarsdagpartytjie-foto’s saam met die volgende boodskap gestuur:

“Thank you for the lovely session today. It was very emotional but also assured us that Justin is in God’s hands. We ask for you and uncle Charl to please stay strong for the sake of Candice and God bless your family. In our language, we say, “ A robale ka Kagiso” which means “May he Rest In Peace” From the Mokgoadi Family.

Dit was merkwaardig hoe sy vriende van kleins af verteenwoordigend was van al die verskillende kulture in ons land. Dit was wonderlik om te weet dat almal se liefde vir Justin ‘n gemene deler is en dit het my ongelooflike hoop gegee vir ‘n toekoms in ons pragtige land.

Ons laaste groet

Ek en Zander het die laaste aand voor ons Switserland toe gevlieg het in Justin se woonstel geslaap en die voorreg gehad om sy pragtige meisie, Trish, te ontmoet. Justin het vir my en Zander gehelp om by die lughawe uit te kom. Hy was dus die laaste persoon wat ek voor ons vlug in Suid-Afrika gegroet het. Min het ek geweet dit was die laaste keer dat ek hom sou sien.

Wanneer ons met die dood gekonfronteer word, dwing dit ons om weer te dink oor die lewe en hoe ons ons kosbare tyd gebruik. Die ervaring het my herinner aan ons impak op die wêreld en hoe ander ons sal onthou.

Groete

Emsia

Ek is ‘n produk van my besluite

Ek is ‘n produk van my besluite

Ons moet almal ‘n paar belangrike besluite tydens ons lewens neem. Hierdie besluite het ‘n wesenlike impak op ons, maar raak ook die mense na aan ons. Die implikasies van hierdie besluite kan jare of selfs dekades duur. Gevolglik is dit soms stresvol om groot besluite te neem en verg baie moed.

Die jare direk na skool

Jong volwassenes moet besluit hoe om hul kosbare jare direk na skool deur te bring. Hierdie tyd is van kardinale belang om hulself vir die res van hul lewens voor te berei. Hierdie besluit het ‘n impak op die kennis wat hulle verkry, die vaardighede wat hulle ontwikkel en die mense wat hulle ontmoet.

Sommige jong volwassenes het sekerheid oor wat hulle wil doen en werk volgens ‘n plan. Hulle het duidelikheid oor die hoekom, wat en hoe-vrae. Ander is egter onseker hoe hulle hierdie kritieke jare wil deurbring. Hul aanvanklike planne werk soms nie uit nie of dit verskil baie van hul ouers se sienings. Dit kan ‘n baie stresvolle tydperk vir jong volwassenes en hul ouers wees. In my brief getiteld, verlaat die nes, deel ek meer oor my ervaring as ‘n ouer.

Verhoudings

Almal neem besluite oor verhoudings. Ander mense se impak op jou is beduidend, en jy moet dus besluit wie jy in jou binnekring toelaat en waar jou grense lê. Dit raak uitdagend wanneer jy besef dit is tyd om ‘n hegte verhouding te beëindig. Dit gebeur gewoonlik omdat die verhouding nie meer konstruktief is nie en langtermyn doelwitte en waardes nie meer in lyn is nie. Hierdie besluite veroorsaak groot konflik, verlies en hartseer.

Loopbaan

In ‘n vinnig veranderende wêreld is dit die uitsondering as mense se aard van werk of werkplek dieselfde tydens hul loopbane bly. Loopbaanbesluite beïnvloed jou finansiële beplanning en persoonlike groei. Dit beïnvloed ook die vlak van vervulling en gemoedsrus wat jy ervaar. Soms het jy nie beheer oor loopbaanbesluite nie. Besighede sluit, afleggings vind plaas of aanstellingskriteria verander om diversiteit en inklusiwiteit te bevorder. In hierdie situasies het jy slegs beheer oor jou reaksies en optrede.

Verhuising

Loopbaanbesluite, verhoudings of lewensfases lei gewoonlik tot verhuisingsbesluite. Dit veroorsaak gewoonlik baie veranderinge en aanpassings. In my brief getiteld, groot, moeilike besluite, deel ek meer oor die besluit en die impak van ons skuif van Suid Afrika na Switserland.

Lesse geleer uit my eie lewensbesluite

Ons het selde sekerheid oor wat die regte besluit in elke situasie is. Ons gee ‘n stap in geloof en gee ons beste. Baie van my lewens besluite het nie uitgewerk soos ek beplan het nie. Ek het uiteindelik ‘n loopbaan gehad wat baie anders was as wat ek studeer het, en my eerste huwelik het in ‘n egskeiding geëindig. Ek is egter oneindig dankbaar vir die lewenservaring en persoonlike groei wat uit die besluite voortgespruit het. Hulle het bygedra tot ‘n kleurvolle reis.

Ek het ook deur die jare geleer dat die gebrek aan ‘n lewensbesluit wanneer dit nodig is, baie vrede kan steel.  Moed is ook ʼn besluit.

Oorwegings tydens lewensveranderende besluite

Ons neem dikwels groot, moeilike besluite op grond van ʼn “gut feeling”. Dit is egter nodig dat jy vir jouself evalueer hoe die besluit:

  • Jou visie, lewensdoel en langtermyndoelwitte beïnvloed;
  • Verskillende aspekte van jou lewe affekteer om te voorkom dat jy so gefokus is op een aspek en in die proses nalaat om te dink oor die impak op alle ander aspekte; en
  • Jou persoonlike waardes ondersteun. Persoonlike waardes is die dinge wat vir ons belangrik is en ʼn groot impak het op ons lewensgeluk, trots en persoonlike vervulling.

Niemand kan jou lewensveranderende besluite namens jou neem nie.  Jy is egter welkom om my te kontak as jy die hulp van ʼn onafhanklike coach nodig het jou te help om by jou antwoord uit te kom.

Groete

Emsia

Tegnologie het ons leefwyse verander

Tegnologie het ons leefwyse verander

Tegnologie het ‘n toenemend veranderende impak op hoe ons leef. Digitalisering is ‘n gonswoord. Ek is skaam om te erken dat ek digitalisering nie met dieselfde opgewondenheid as die res van my gesin verwelkom nie. Ek fokus soms op die ongerief van verandering eerder as die ongelooflike geleenthede wat dit skep. My familie sorg egter dat ek nie agterbly nie.

Tuis outomatisering

Charl werk in tegnologie en raak baie opgewonde oor nuwe ontwikkelings. Hy het talle outomatisering in ons huis in Suid-Afrika geïmplementeer en die alarm, sekuriteitskameras en motorhuisdeure vanaf sy foon beheer. Toe hy weg van die huis af gewerk het, het die outomatisering hom toegelaat om na al die kameras te kyk.

Charl was reeds op die dag van Christo se 18de verjaardag en partytjie in Switserland. Ek het die buitekamera daardie aand afgeskakel omdat ek bekommerd was dat Charl se hart nie sterk genoeg is om na ‘n huispartytjie te kyk terwyl hy by ‘n nuwe werk in ‘n nuwe land aanpas nie.

Charl het ‘n Google Home vir ons woonstel in Switserland gekoop. Dit speel musiek en verskaf die weervoorspelling op versoek. Ek raak egter baie geïrriteerd as Google Home nie my aksent en vriendelike stemtoon verstaan nie. Dit reageer dadelik op Zander se instruksies. Ek het vir Charl en Zander ingelig dat as hulle ooit op dieselfde manier met my praat as met Google Home, ek my tas huis toe pak. Dit was nog voor Covid, bygesê.

Skool

Die ICS-skool voorsien elke kind van ‘n Chrome-boek waaraan hulle by die skool werk en huiswerk doen. Die skool het lisensies vir verskeie sagteware wat die leerders in verskillende vakke gebruik, soos Ontwerp en Kuns. Selfs die biblioteekboekuitleenstelsel is geoutomatiseer. Ouers kan dus ook boeke aanlyn leen en lees.

Supermarkte

By supermarkte word die koop- en betaalproses ook geoutomatiseer. Kliënte moet ‘n skandeerder met hul kaart by die winkelingang aktiveer voordat hulle elke item wat hulle in die trollie laai, skandeer. Ná die aankope betaal hulle by ‘n terminaal. Dit het baie handig te pas gekom tydens Covid-19. Personeellede doen soms steekproewe op geselekteerde kliënte om hulle eerlik te hou.

Die eerste keer dat hulle my vir ‘n steekproef gekies het, was ‘n traumatiese ervaring. Met die finale skandering voor betaling het groot rooi letters, WARTEN, op die skerm verskyn. ’n Winkelassistent het opgedaag en versoek dat ek my trollie moet uitpak, aangesien sy alles weer moet skandeer. Ek kon voel hoe my temperatuur styg, veral toe sy my daarop wys dat ek vergeet het om die strepieskode van die jogurt te skandeer! Ek het die winkel verlaat sonder ‘n kriminele rekord maar was baie verleë .

‘n Blog vir my Briewe

My vriende het my aangemoedig om my gereelde briewe op ‘n Blog te plaas. My vrees vir tegnologie en sosiale media was die twee faktore wat my langer as ‘n jaar daarvan weerhou het om dit te doen. Ek moes dit sien as iets nuuts om te probeer leer.

Sekere aspekte was intuïtief, maar ander was meer uitdagend om uit te vind. Ek het gereeld gewens dat iemand langs my moet sit en help. Die aanlynwêreld het nie ‘n telefoonnommer of ‘n e-posadres nie. Jy maak staat op aanlyn artikels geskryf deur mense wat ‘n soortgelyke probleem ervaar het.

Die hele ervaring het my aan die volgende herinner:

  • In ‘n veranderende wêreld is nuwe en onbekende dinge en ervarings ‘n gegewe. Ons moet hulle sien as deure wat nuwe wêrelde oopmaak.
  • Dit is baie bevredigend om iets suksesvol te doen nadat jy daarmee gesukkel het.
  • Ons is deel van die geskiedenis en het die voorreg om vinnige tegnologiese verandering te aanskou.
  • Almal het die ondersteuning en aanmoediging van ander mense nodig om iets nuuts te probeer. Ons moet dit met liefde en genade ontvang en in oorvloed uitdeel.

Groete

Emsia

Leefstyl veranderinge in Switserland

Leefstyl veranderinge in Switserland

Dit is soms nodig om te reflekteer op die pad wat jy gestap het, die keuses wat jy gemaak het en die impak daarvan.  Om in Switserland aan te pas het ons ʼn hele aantal leefstyl veranderinge gemaak.  Sommige van ons veranderinge was by keuse en ander was vir ekonomiese of praktiese redes.

Vervoer

Ons het ʼn groot aanpassing ten opsigte van vervoer gemaak. Ruimte en parkering is beperk en ons maak, soos die res van die mense in Switserland, gereeld van openbare vervoer gebruik. Ons ry fiets of stap as alternatief. Zander het baie vryheid tussen openbare vervoer en sy scooter.

Ons het na ons eerste jaar ʼn motor gekoop om ons opsies uit te brei. Charl moes weer ʼn praktiese rytoets aflê om ʼn Switserse bestuurslisensie te kry. Ek het meer daaroor in ‘n brief met die titel toetse op die pad gedeel. Ek het egter twee jaar laas in Suid Afrika bestuur, maar dink ek is heelwat fikser.

Eetgewoontes

Daar het ʼn groot verandering in ons eetgewoontes plaasgevind. Ons bederf na ʼn rowwe week in Suid Afrika was om naweke uit te eet of ontbyt op ʼn wynplaas te geniet. Ontbyt is nie eintlik ʼn groot ding hier nie.  Die Switsers kry sommer vinnig ʼn “gipfile” (croissant) of “Brezel” (reuse pretsel) en koffie op die treinstasie of by ʼn bakkery.

Uiteet is duur en die verskeidenheid opsies is beperk. Ek kan die kere wat ons uitgeëet het op my een hand tel. Dit is ook bekend dat koffie drink in Switserland die duurste in die wêreld is.

Ons leef amper heeltemal vegetaries.  Die vleisopsies is beperk en vleis is baie duur. Ek bederf so nou en dan vir Zander met ‘n hamburger of ʼn varkworsie. Die vleis en veral die hoender is vir my smaakloos.  Ons spyskaart is nou deesdae vegetaries.

Verblyf

Ons het ʼn groot huis met ʼn lieflike tuin in Suid Afrika verruil vir ʼn klein woonstel op die eerste vloer in ʼn groot woonstelkompleks Ankenbüel, in Zumikon. Skoonmaakhulp is 15 maal duurder as in Suid Afrika. Ek is dus dankbaar dat ons plek klein is, want die skoonmaaktaak is natuurlik na my rolbeskrywing geallokeer. Ons leef ligter met minder verantwoordelikheid en verpligtinge wat met huisinstandhouding gepaard gaan.

Die kleiner leefruimte veroorsaak dat ons meer permanent in mekaar se persoonlike ruimte is wanneer ons almal tuis is.  Ons het dit aanvanklik as ʼn potensiële probleem gesien, maar nou geniet ons die samesyn. Die aspek was egter tot die uiterste getoets met die Covid-19 inperking.

Diversiteit

Meeste mense wat in die woonstelkompleks woon, kom van verskillende dele in die wêreld. Die internasionale skool bestaan natuurlik ook uit families van reg oor die wêreld. Ons word dus blootgestel aan diversiteit op baie vlakke.  Deur Zander se maats leer ons van verskillende kos, kultuur, taal en dinge waarvan ons nooit geweet het nie.  Dit help ons om met nuwe oë en respek na diversiteit kyk.  Dit veroorsaak ook dat ons meer respek en waardering het vir ons eie land, sy mense en tradisies.

Taal

Ons Duitse woordeskat het al redelik uitgebrei en ons begrip van die taal is redelik, maar ons kan nog nie ʼn behoorlike gesprek in Duits voer nie. Ek was selfs in Suid Afrika nie altyd mooi op die program nie, maar hier het dit ʼn nuwe dimensie bereik. Dit is soms ʼn groot uitdaging. Die verwaging is dat jy die land waar jy woon se taal moet kan praat en met tydsverloop raak almal se geduld met jou al hoe minder.

Ons geniet die nuwe geleenthede en persoonlike groei wat dit meebring.  Die verandering het beslis ʼn groot impak op ons perspektiewe in ʼn veranderende wêreld. Ons word gereeld met ons self en ons uitkyk op dinge gekonfronteer.  Soms moet ons maar net vir ons self lag oor die flopse en flaters wat ons begaan.  Groei gebeur nie sonder die nodige groeipyne nie.

Groete

Emsia

Die lewe se doel en betekenis vrae

Die lewe se doel en betekenis vrae

Waarom is ons hier? Wat bied ons aan? Hoe kan ons ons aanbieding op ‘n unieke manier beskikbaar maak? Simon Sinek verduidelik in ‘n gewilde TED Talk hoe die suksesvolste organisasies dink, optree en kommunikeer as hulle met die Waarom vraag begin. Daar is ooreenkomste tussen die vrae wat organisasies hulle self en ons as individue ons self afvra.

Pesoonlike doel en betekenis

Elkeen van ons kom as ‘n unieke individu op aarde om ʼn spesifieke bydrae tot ʼn beter samelewing te lewer.  Gedurende ons eerste 18 jaar help ons ouers en die gemeenskap ons voorberei vir die doel. Gedurende hierdie tyd ontdek ons ook van ons passies en talente. Dit is gewoonlik gedurende hierdie laat tienerjare wat ons onsself die Waarom, Wat en Hoe vrae begin vrae.  Om ‘n doel te hê, is ‘n belangrike aspek van ‘n vervullende en betekenisvolle lewe.

Sommige mense beantwoord hierdie groot vrae deur betekenisvolle en bevredigende werk. Vir ander lê hul doel in hul verantwoordelikhede teenoor hul familie of vriende. Sommige mense slaag daarin om hul doel in alle aspekte van hul lewens uit te leef. Daar is baie maniere waarop ons ons doel en bydrae kan uitleef.

Verandering is die enigste konstante in die lewe

Die enigste sekerheid van die lewe is dat dit voortdurend verander. Omstandighede rondom ons verander, maar lewenservarings en -fases veroorsaak dat innerlike verandering ook plaasvind. Verandering in omstandighede kan lei tot ‘n verandering in die manier waarop ons ons doel uitleef. Soms bring gevoelens van verveeldheid, ongemotiveerdheid of nutteloosheid die “Waarom?”, “Wat?” en “Hoe?” vrae op.

Die manier waarop ons ons doel uitleef en bydra, kan gedurende verskillende fases van ons lewens baie verskil. Daar is egter altyd behoeftes rondom ons wat ons kan aanspreek deur middel van ons kennis, vaardighede en ervaring. Gewoonlik vereis dit dat ons uit ons gemaksone kom.

My ervaring met doel en bydrae

Mense en persoonlike groei is onderwerpe wat my na aan die hart lê. Ek het dus jare gelede ‘n Diploma in Coaching voltooi. Tydens die opleiding moes ons ons “purpose” verwoord. Ek het gedink aan die rol wat ek deur die jare in verskillende omstandighede gespeel het en het ook my waardes oorweeg. Dit was waardevol om ook die persepsies en opinies van mense na aan my te kry. Ek het my “purpose” soos volg verwoord:

Na al die verandering en aanpassing in Switserland het ek weer die punt bereik waar myself moes konfronteer met die Waarom, Wat en Hoe vrae? Ek het besluit om weer meer te fokus op my rol as life coach. Ek wil graag die vaardighede en tegnieke wat ek geleer het saam met my lewenservaring gebruik om ander te help antwoorde vind op hulle vrae.

Kontak my asseblief as jy op die punt is waar jy dink oor jou groot lewensvrae en baat kan vind by ʼn coaching proses om jou op ʼn gestruktureerde wyse te help om die antwoorde op hierdie vrae te vind.

Groete

Emsia

Medaljes vir toewyding en opoffering

Medaljes vir toewyding en opoffering

Die onlangse Olimpiese Spele het my soos ‘n sterk seestroom ingesuig. Ek was op die kruin saam met sekere atlete, hul afrigters, familie en spanlede. Ek het egter ook trane gestort oor teleurstellings en drome wat nie uitgewerk het nie.

Die Olimpiese medalje simboliseer harde werk, toewyding, opoffering en geduld. Dit dien as ‘n motivering vir die duisende mense wat die pandemie wêreldwyd beveg.

Medal of Honour

Ons is vertroud met die VSA se Medal of Honour, die hoogste vorm van erkenning wat ‘n militêre lid kan verdien. Vir sommige dui die Medal of Honour op diepgaande dapperheid en heldhaftigheid. Vir ander simboliseer dit enorme opoffering, toewyding en diens.

Vir mense wat die medalje ontvang, is die betekenis daarvan dikwels diep persoonlik en gevul met talle emosies wat uniek is aan elke individu en hul ervaring. Dit is ‘n tasbare herinnering aan ‘n moeilike tyd in hul lewens en verteenwoordig dikwels enorme persoonlike verlies en opoffering. Hierdie gewone mense het buitengewone dinge gedoen vir ‘n beter toekoms.

In die afgelope jaar het ek verskeie mense gesien wat buitengewone dinge gedoen het vir die mense vir wie hulle lief is. Hierdie mense sal nooit ‘n medalje ontvang vir hul onbaatsugtige liefde en opoffering nie.

Burger en Dalene Prinsloo

In ‘n vorige brief het ek meer oor Burger en Dalene se innerlike reis in ‘n vreemde land gedeel. Burger het ná sy ernstige beroerte op 18 Augustus 2020 ses maande in hospitale in Duitsland en die laaste ses maande in Suid-Afrikaanse rehabilitasiesentrums deurgebring. Dalene het uit haar werk bedank en Burger op elke moontlike manier ondersteun. Hulle het ’n hele span terapeute, familie en vriende wat hulle ook ondersteun. Ek kan egter ’n hele boek skryf oor al hul uitdagings die afgelope jaar. Hulle het onder andere beide Covid-19 gekry.

Hulle is tans in Johannesburg by hulle dogter om terapie vir Burger moontlik te maak. Dalene laat weet in haar onlangse terugvoer:

Ons is gesond en Burger vorder goed.  Hy kan al amper 100 tree op ‘n slag stap.  Sy spiere is maar styf en hy ervaar pyn met die skielike oefening na 10 maande in die hospitaalbed. Volgens die terapeute klink dit of ons nog ʼn verder 10 maande hier moet bly voordat ons huis toe kan gaan.  Ons pak die reis dag vir dag in geloof aan en ons weet die wenstreep wag!

Die pandemie

Die pandemie het baie trauma en verlies veroorsaak, en baie gesinne het geliefdes verloor. Ander het hul werk of bronne van inkomste en sekuriteit verloor. Dit verg dapperheid om soggens uit die bed op te staan en jou verantwoordelikhede na te kom. Bomenslike krag word vereis om met jou pyn te sit, vir eksamens te studeer en met take by die huis te help omdat ma of pa nie meer daar is nie.

My hart bloei toe ek in ʼn brief van ʼn jong meisie wat onlangs beide haar ouers verloor het, die volgende woorde lees.

Ek wil Sondag na kerk weer gaan buns koop en ʼn warm bun uit die sak steel en op pad huis toe in die kar eet.  Ek wil in die chaos instap waar jy mamma se huiskos ruik. Ek wil gou hardloop om ander klere aan trek.  Ek sal vinnig my kamer deur toemaak want my bed is deurmekaar en my kerkklere lê nog op die grond. Ek weet mamma raas nie Sondae nie. Ek wil net weer tyd kan terug draai en by die HUIS wees.

Ek wil graag vir al hierdie gewone mense, soos Burger en Dalene, wat buitengewone dinge doen sê:

“Julle ingesteldheid en deursettingsvermoë, ten spyte van vele uitdagings, gee vir my en ander hoop en dien as aanmoediging en inspirasie!”

Groete

Emsia

Die lewe bestaan uit kleurvolle oomblikke

Die lewe bestaan uit kleurvolle oomblikke

Die lewe bestaan uit oomblikke.  Oomblikke is soos foto’s wat in die geheue-album gebêre word om weer stadig deur te blaai vir onthou.

Verlede jaar was ʼn mylpaalverjaarsdag vir Charl.  Mylpaal verjaarsdae dwing ons om terug te kyk op die onthou oomblikke van die lewe. Charl se liefde vir legkaarte en myne vir foto’s was die boublokke vir sy geskenk idee.  By die bekende verskaffer van legkaarte, Ravensburger in Duitsland, kan ʼn mens jou legkaart ontwerp met jou eie foto’s.  Ek het die ontwerp van die legkaart en Charl die bou daarvan ewe veel geniet.

Ons lewe is soos een groot legkaart

Ons lewe is soos ‘n groot legkaart wat bestaan uit oomblikke wat die prent vorm en inkleur. Daar is tye waartydens ons net kan fokus op die stukkies uitgepak op die tafel wat soos ‘n deurmekaarspul lyk.

In tye wat oorweldigend voel, help dit om ʼn kreatiewe en terapeutiese projek aan te pak, want dit gee ons onderbewussyn kans om sin te maak uit die warboel van gedagtes. Ons kry kans om holisties na ons lewe te kyk en al die stukkies as uitdagings of geleenthede eerder as onmoontlikhede te sien. Dit help om te verstaan hoe hierdie legkaartstukke in mekaar pas om ‘n groter prent te skep.

Ons prente bestaan uit gekleurde maar ook swart en grys stukkies. Die swart en grys stukke help ons om meer waardering te hê vir die gekleurde stukke. Dit is die kontraste wat die prent uniek maak.

Ons moet onthou oomblikke skep

Dit is belangrik om geleenthede vir onthou-oomblikke te skep. Ek het al vir jare die gebruik om Desembermaande deur my jaar se foto’s te gaan en hulle te sorteer. Dit is deel van my manier om oor die jaar te reflekteer, maar dit dien ook as waardevolle aanmoediging om oop te wees vir nuwe idees en geleenthede.

Hier is Switserland is my lewe minder gejaagd en fokus ek doelbewus daarop om die gewone oomblikke net te geniet. Ek moet teenwoordig wees om waar te neem.  My saamwees oomblikke met Zander, as ons laatlam, is besig om vinnig minder te word. Hierdie gewaarwording dwing my om teenwoordig te wees terwyl ons gesels oor ons oggend koffie in die bed.

Ek het nou begin om aktiwiteite in die omgewing asook veranderinge in die natuur meer bewustelik waar te neem as ek winkel toe stap. Ek maak oogkontak en glimlag as ek die mense wat verby my stap groet en ervaar dit as ʼn gedeelde oomblik wat deel van mekaar se dag vorm.

Ons moet mekaar onthou oomblikke gun

Soos my seuns groter word en hulle eie lewens begin leef, verstaan ek ook al hoe meer die belangrikheid daarvan om vir mekaar onthou-oomblikke te gun. In elke gesin het elke individu sy eie passies en gunsteling plekke en mense.

Kahlil Gibran druk dit so mooi uit in die volgende stuk wat hy geskryf het met ʼn huweliksverhouding in gedagte. Dit is egter net so waar met ander nabyverhoudings:

Gedeelde oomblikke al is ons vêr van mekaar

Covid tye dwing ons om kreatief te wees in ons pogings om gedeelde oomblikke ten spyte van afstand te êrvaar. Ons het as familie en vriende reg oor die wêreld elkeen ʼn kreatiewe projek aangepak. Die kreatiewe projekte het gewissel tussen paint-by-numbers, diamond-dot-painting, akrielverf op canvas en lego en ander bouprojekte.

Ons het ons vordering met mekaar gedeel deur middel van foto’s en so samesyn ervaar.

Groete

Emsia

Woorde het my reddingstou geword

Woorde het my reddingstou geword

Ek was nog nooit een vir baie woorde nie.  Ek geniet diep en insiggewende gesprekke, maar is gewoonlik beter met luister as met praat. Die afgelope twee jaar is woorde egter my enigste vorm van kontak met ander mense. 

Die woorde wat ek hoor en praat

Telefoongesprekke het my voorheen angstig gemaak. Deesdae het ’n telefoonoproep my nuwe geskenk geword. Ek sien uit daarna om iemand se stem te hoor. My weeklikse oproep met my ma is soos ‘n konstante waaraan ek vasklou. Ek is dankbaar vir die voorreg om haar stem te hoor. Nadat ons inligting oor die welstand van familie en vriende gedeel het, gesels ons oor ons passies en belangstellings. Ons verlustig ons ook in die kosbare oomblikke en positiewe herinneringe van die verlede. Dit is altyd spesiaal om my ma te hoor lag.

My seuns hou ook nie van telefoongesprekke nie, maar deesdae gesels ons vir ure oor die foon. Ons het voorheen ons liefde vir mekaar uitgedruk deur tyd saam te spandeer en aktiwiteite saam te doen. Dikwels het dit in stilte geskied, omdat mekaar se teenwoordigheid genoeg was.  Ons het mekaar met take gehelp of met klein geskenkies verras.  Aanraking, as ʼn uitdrukking van omgee, het terloops in die verbygaan gebeur. Woorde is nou al wat ons het.

Die woorde wat ek skryf en lees

Ek ervaar skryf as ‘n waardevolle manier om van die emosies wat my wil oorweldig, ontslae te raak.  Dit help my om sin te maak van wat ek voel.  Die papier gee nie raad nie, luister geduldig en gee vir my perspektief en antwoorde. Gedurende my egskeiding het ek my emosies in digvorm neergepen. Met ons trek Switserland toe, help my briewe elke twee weke my om sin te maak van gebeure, kontak te hou en herinneringe op papier te lewendig te hou.

Ek lees graag en vind dikwels antwoorde op my vrae in geskrewe vorm. Soms vind ek selfs bemoediging in geskrewe stukke, gedigte en wyse woorde van mense op sosiale media. Ek het geleer om selektief te wees met die aard en die bron van die inligting wat ek lees. Woorde het ʼn groot impak op my gedagtes, wat oorspoel na my gevoelens en het ʼn impak op my aksies.

Woorde is kragtig

Woorde is ʼn draer van inligting en emosies. Dit het ʼn impak op ander mense.  As woorde ʼn mens se enigste vorm van konneksie word, moet jy hulle versigtig kies.  Dit is belangrik vir die een wat dit spreek maar ook vir die een wat dit hoor. Woorde kan opbou, inspireer, motiveer, erkenning gee en liefde oordra.  Dit kan egter ook afkraak, ontmoedig en twyfel en onsekerheid saai. 

Ons woorde is ‘n bevestiging vir die wêreld van hoe ons ander, ons lewens en onsself sien. Wanneer ons iets hardop sê, word hierdie woorde ʼn waarheid vir onsself, maar ook vir almal wat dit hoor.  Dit is baie belangrik dat ons waak oor ons woorde en seker maak hulle is waar en positief.  Woorde kan nie terug getrek word nie.

Die pen is magtiger as die swaard

Ek het waardering vir die idioom wat lui, “Die pen is magtiger as die swaard”. Geskrewe woorde kan ander oortuig, opvoed, inlig en meer verandering te weeg bring as wat geweld of misbruik van mag ooit kan doen. Dit gee ander die geleentheid om die woorde te oordink, emosionele reaksie te ervaar en aksie te neem uit eie wil.

Woorde het my reddingstou geword en ek is dankbaar vir elkeen wat my met die uitruil van woorde help om kop bo water te hou.

Liefdegroete

Emsia