Groot was my vreugde toe ek kersies in die Switserse winkels begin sien.  Ek vind uit dat Zug, wat naby aan ons geleë is, bekend staan as ʼn kersiestad. Kersies is meer as 1800 jaar gelede deur die Romeine in Switserland gevestig. Daar word al die afgelope 400 jaar, jaarliks ʼn kersiemark in Zug gehou. Zug is ook bekend vir sy kersietert en sy kersiebrandewyn (Kirsch).

Ons uitstappie na Zug het ons verwagtinge oortref. By die mark was daar baie soorte kersies, ander rooi vrugte en verwante produkte. Ons het met ‘n hele boks vol soet kersies en kersiekonfyt weggestap.

Kersies herroep kosbare herinneringe

Helderrooi, sonryp kersies verlei my. Ek is mal oor hul vorm, kleur en tekstuur en die smaak is hemels. In Suid-Afrika het hul skaarsheid bygedra tot die aanloklikheid. Ek het kosbare herinneringe gehad aan die pluk van kersies in Ceres saam met die familie tydens ‘n Kersvakansie. Ons is huis toe met moeë kinders en sakke vol kersies.

Kersies was daardie jaar se Kersete-tema. Met almal se kreatiewe voorstelle het al die disse op die Kersspyskaart kersies bevat. Daar was kersiekonfyt by die potbrood, ‘n kersie-en-brandewynsous by die steak en ‘n vrugteslaai met kersies. Die ete is afgerond met ‘n sneeuwit pavlova met helderrooi kersies as nagereg. Na Kersfees is ons almal vir ‘n jaar van kersies genees!

Baie buitelanders woon in Zug

Zug is ‘n pragtige dorpie langs ‘n turkoois meer. In Switserland het elke kanton sy eie belastingkoerse. Zug is die kanton met die laagste belastingkoers. Dit is dus gewild onder buitelanders en het ‘n internasionale skool. Zug het ’n Switserse atmosfeer, maar meer mense praat Engels as in die ander dorpe.

Zug, wat al 800 jaar bestaan, het ‘n pragtige ou stad met paaie uit klip en historiese geboue. Musikante met ‘n trekklavier voor ‘n restaurant het bygedra tot die atmosfeer. Hulle het hul gaste met musiek en drankies verwelkom. Ons het die dag met bier en pizza by ‘n Italiaanse restaurant langs die meer gevier. Uiteet in Switserland is ‘n luukse.

Zugersee verras vir Zander met ʼn scooter

Zander het voorbereid in sy swembroek gegaan. Met ons aankoms het ons op die rotse langs die meer gaan sit om al die eende en hul donsige baba eendjies dop te hou. Zander het die ysige water aangedurf en genoeg aangepas om te kon rondswem.

Die volgende oomblik sien hy iets wat hom opgewonde maak – ’n scooter wat net soos sy scooter gelyk het. Nadat hy ingeduik het, het hy die scooter, bedek met groen mos, langs die meer neergesit. Hy was van plan om die scooter skoon te maak en huis toe te neem.

Zug het baie meer opgelewer as waarvoor ons gehoop.  Die pragtige dorp het al ons verwagting oortref.

Kersiegroete

Emsia