“Ons is verloof!” lees die WhatsApp-boodskap vroeg op ‘n Sondagoggend. Hierdie boodskap het ons met vreugde en opgewondenheid gevul aangesien ons Candice soos ‘n kind liefhet. Haar lewenspad was vol uitdagings, maar haar veerkragtigheid en positiwiteit het nog altyd as inspirasie gedien. Ons wou deel wees van hierdie vreugdevolle huweliksviering.

Ons het vriendskap en ‘n 21ste verjaarsdag gevier

Die troudatum van 5 Maart het die geleentheid geskep om ander spesiale oomblikke in Suid-Afrika te vier. Ons het die Switserse skool se ski-vakansie benut en sneeu vir die son verruil. Tydens ons tyd in die Wes-Kaap het ons vriendskappe en Christo se spesiale 21ste verjaardag in my geliefde Stellenbosch gevier.

Ons het kindertyd herinneringe in die Kalahari gevier

Dit was ‘n groot voorreg om tyd saam met my ma en suster in ons kinderhuis te spandeer. In Kathu het ons plekke besoek waar herinneringe ontstaan het en die impak van tyd op die dorp bespreek. Net so kon ek saam met ou skoolmaats wat nog in Kathu bly lag oor hoe tyd ons beïnvloed het.

‘n Spesiale plek is die gholfbaan met sy pragtige groot doringbome. Toe die bemarkingsbestuurder hoor ons is van Switserland, het hy vir ons gholfkarretjies aangebied om op die gholfbaan rond te ry.

Ons het die nuuskierige meerkatte en springbokke, wat hierdie lieflike plek hul tuiste gemaak het, geniet. Ons het my ma se verjaardag met ‘n groot stuk koek by die Kalahari Country Club se restaurant gevier.

Tristan en Candice

Ons het Tristan tydens hul besoek in Desember 2019 ontmoet.  Hulle was opgewonde oor die geleentheid om in Thailand skool te gee. Covid-19 het egter hul planne beïnvloed en baie uitdagings en verliese geskep. Die grootste hiervan is die verlies van Justin, Candice se geliefde broer, wat op 25-jarige die ouderdom gesterf het.

Tydens die Covid-19-inperking het Tristan en Candice by Tristan se ouers gebly en ook tyd by sy grootouers in Leeuppoort deurgebring. Tristan en Candice het baie stories oor die familie en die vriende in hul lewens gedeel.

Hierdie vriende wat hulle in hul donkerste tye ondersteun het, het opgewonde bymekaargekom om hul troue saam met hulle te vier. Om al die spesiale mense te ontmoet het bevestig hoe ons Hemelse Vader die regte mense oor ons pad stuur om ons op verskillende maniere lief te hê, te ondersteun en te versorg.

Die huwelik was ‘n vreugdesviering

Hulle troue was in Leeupoort, ʼn vakansiedorp in die Bosveld.  Die rustigheid in die wildreservaat waar sebras en vlakvarkies tussen die huise en chalets wei, was sielskos vir almal.

Zander het die week voor die troue sy skool in Zürich aanlyn bygewoon. Zander het ná sy wiskundesessie gevra of hy vir die onderwyser die sebras en vlakvarke agter hom op die skerm kan wys. “Sjoe, dit is wild!” was die verbaasde onderwyser se reaksie.

Die troue was ‘n fees van vreugde onder die groot doringbome waarin die voëls gesing het. ‘n Paar njala-bokke het nuuskierig nader gestaan om Tristan en Candice se huweliksbeloftes aan mekaar te aanskou.

Ons moet die lewe se spesiale oomblikke vier

Ek het tyd gehad vir besinning tydens die terugvlug. Die troue en verskeie vieringe het my daaraan herinner dat ons tyd moet neem om dit wat goed is in ons lewens te vier. Die volgende woorde van Khalil Gibran het by my opgekom:

Groete

Emsia