Aan die einde van elke jaar stap kinders vir die laaste maal by die skool uit en maak gereed vir ʼn nuwe hoofstuk in hulle lewe.  Aanvanklik is almal maar bang en onseker met die aanvang van die na-skool hoofstuk en jy as ouer hoop en bid vir die beste.  Dit is baie spesiaal om die transformasie en groei in selfvertroue by elkeen op sy of haar unieke manier waar te neem.

Tot dusver het ons die voorreg gehad om die transformasie by Candice en Jacques te kon waarneem en Christo is nou gereed om sy nuwe hoofstuk te begin.

Candice

Candice het vier jaar gelede as onseker eerstejaarstudent haar intrek in ʼn koshuis in Potchefstroom geneem. Sy het hard gewerk, wonderlike vriende gemaak, al hoe meer geleenthede aangegryp en getransformeer in ʼn pragtig jong selfstandige vrou. Sy het pas haar onderwysgraad by NWU in Potchefstroom voltooi en sien uit na ʼn jaar van skoolhou saam met haar vriend Tristan in Thailand.

Christo

Christo het sy intrek in Matieland as eerstejaar geneem om ingenieurswese te studeer . Ek sou graag wou help pak en rondry om die laaste benodigdhede vir Christo se nuwe hoofstuk te kry. Ek wou graag die rektor se toespraak op ʼn pragtige somersnamiddag op Coetzenburg gaan luister terwyl ek opgewonde oor die wonder van jonkwees raak. Ek kon egter net aan hierdie kant van die aardbol sit en na koshuis intrek-foto’s kyk met Stellenbosch se blou berge en groen akkerbome wat die agtergrond inkleur. Die rektor se toespraak het ek op ʼn video gekyk wat ʼn dierbare vriendin vir my gestuur het.

Universiteit Stellenbosch

Jare gelede het ek al verlief geraak op Stellenbosch met sy Eersterivier, ou eikebome en uitbundige studentevrolikheid. Alreeds werkend, het ons Maties se Vensters-geleentheid en die feestelikheid van die eerstejaarstudente se bydraes tot die vermaaklikheidsprogram geniet. Ek het begin uitsien na die dag dat ek deel kon wees van my eie kinders se studentejare in hierdie historiese dorp. ‘n Paar jaar gelede het ons ‘n woonstel in Stellenbosch gekoop tussen die Fakulteit Besigheid en Ingenieurswese, sodat die studentehuisvesting vir die seuns in plek is.

Jacques

Met groot opgewondenheid het ons die Desember van Jacques se matriekjaar in 2017 die woonstel reggekry vir sy groot begin. Die mansstudent wat op daardie stadium uit ons woonstel getrek het, was ʼn tweedejaars ingenieurs student wie se ouers in Dubai gewoon het.  Die jongman was so selfstandig. Ek was baie beïndruk oor hoe hy self regkom, maar ek het tog ook so jammer vir hom gevoel met sy ouers so vêr.  Ek dank die Vader elke dag dat ons nie weet wat die toekoms inhou nie, want min het ek geweet wat vir my voorlê!

NWU Potchefstroom

Binne ‘n week nadat Januarie 2018 aangebreek het, het die realiteite tot my deurgedring dat Jacques nie ʼn Matie gaan word nie. Ek was verplig om te aanvaar dat Ons Hemelse Vader ander planne vir hom het. Ek moes baie hartseer en onseker oor hoe hy sy pad gaan vind, afskeid van hom neem in die vertreksaal van die lughawe vir sy reis Potchefstroom toe, wat 1300km ver weg is.

Hy het net vir een nag aan die ander kant slaapplek in Candice se nuwe leë woonstel gehad. ‘n Dun kombersie was al beddegoed was in sy tas kon pas. Die res was aan hom oorgelaat. Hy het blykbaar die kombers as kussing gebruik en die gordyn as laken. Vele wonderwerke later het hy darem blyplek gehad in Campus Key en moes hy vir hom self sorg.

Nou, twee jaar later, sien ek ʼn pragtige jong man wie vinnig moes onafhanklik word, heerlike kos kook, ʼn verskil in ander se lewe maak en hard werk aan sy toekoms. Ek is baie trots op hom.  Jacques  is gretig om sy laaste jaar van sy besigheidsgraad by NWU in Potchefstroom af te handel sodat hy as gebore entrepreneur al sy idees en planne in werking kan stel.  

Christo se intrek in Helshoogte

Op 22 Januarie 2020 het Christo in Helshoogte manskoshuis op Stellenbosch ingetrek om sy hoofstuk as student te begin. Met sy ma vêr weg, is daar baie ooreenkomste tussen my twee seuns se situasies. Hy moes self planne maak, besluite neem en hulp kry waar nodig.

Sovêr gaan dit baie goed en geniet hy al die nuwe ervaringe en mense. Ek staan net altyd verstom oor die engele op ons pad wat help waar nodig met soveel liefde en omgee. Net soos wat ek met Jacques gedoen het, beplan ek om in April 2020 by Christo in Stellenbosch te gaan kuier om te sien hoe sy nuwe tuiste en lewe lyk. Ek kan nie wag nie!

Hierdie paar jaar tussen nes verlaat en jong volwassene gaan ongelooflik vinnig verby.  Dit is ʼn periode van nuwe vriende maak, waardes bevraagteken en toets, ontdek wie hulle is en watter rol hulle in die samelewing wil speel. Die jongmense raak selfstandig en die verhouding tussen ouer en kind verander na ʼn verhouding tussen twee volwassenes. Dit verg groei en aanpassing vir beide partye.

Groete

Emsia