Die Here het my 21 jaar gelede geseën met my Christo-kind as katalisator vir persoonlike groei. Hy is gebore met baie passie, intelligensie en kreatiwiteit. Ons het hom van kleins af man-met-‘n-plan genoem omdat daar nog nooit ‘n tekort aan planne by hom was nie. As ekstrovert was daar altyd ‘n gehoor of spanlede by sy planne betrokke.

Pre-primêr

Na slegs ‘n paar maande in pre-primêre skool het sy onderwyseres ‘n vergadering met ons as ouers versoek. Sy het verduidelik dat daar ‘n groot vlam in hom brand. Sy het ook benadruk dat ons as ouers ‘n groot verantwoordelikheid het om te verseker dat Christo se vlam in die regte rigting brand.

As ek hom na werk by Pre-primêr gaan oplaai het, het hy gewoonlik gevra of ek ʼn bietjie later kan terugkom, want hy speel nog.  Hy en sy maats was altyd besig met ʼn projek op die speelgrond.

As vyfjarige het hy ‘n stalletjie buite die skool opgeslaan om sy kunswerke te verkoop. Sommige mammas het hom uit die goedheid van hul harte ondersteun. Die skool het my egter ingelig oor sy besigheidsaktiwiteite en dat dit teen die skoolreëls was.

Laerskool

Gedurende Christo se laerskooljare, het ek en Mnr Lee, verantwoordelik vir die skooldissipline, mekaar goed leer ken. Ek onthou sy eerste oproep na ‘n speletjiesdag by die skool so goed. Christo het gewonder wat sou gebeur as hy verfballe wat hy in die speelarea gekry het, in die uitlaatpyp van die motor van ’n jong onderwyser sit. Die onderwyser was woedend toe ‘n nuusdraer hom inlig oor die Christo se plan.

Ons het ooreengekom dat ek na skool agter die onderwyser sou aanry na die uitlaatstelsel winkel toe ten einde vir al die skade te vergoed.  Christo se eerste woorde toe hy langs my in die motor klim was:

“Ma, wag asseblief net tot hy sy motor aanskakel.  Ek wil so graag sien wat gaan gebeur!”

Gelukkig het die werktuigkundige almal gerus gestel dat daar nie skade is nie.

Dit was egter nie die enigste oproep van Mnr Lee nie. Ek het hartkloppings gekry as ek sien dat Mnr Lee my probeer bel. Christo was gelukkig goed in Wiskunde, en hy en Mnr Lee het ‘n spesiale verhouding gehad.

Hoërskool

Christo se beste manier van leer is om feite aan ander te verduidelik. Hy het sy geskiedenis of biologie aan my verduidelik op pad skool toe. Dit het bygedra tot my vermaak en algemene kennis.

Hy het Zander vermaak met wetenskaplike eksperimente op die tuintafel. Ek was bang vir `ʼn ontploffing. Buite sy kamer het hy Cannabis-plante gekweek en brandewyn met gefermenteerde vrugte probeer distilleer. Langs sy rekenaar was ‘n Rasberry Pie met ‘n blou lig wat flikker. Ek het my afstand gehou vêr weg van al die kabels.

Sy motorfiets het baie vryheid gebied. Ek het egter baie tyd in gebed vir sy veiligheid spandeer. Gedurende sy laaste skooljaar, net voor ons Switserland toe verhuis het, het ek en hy ooreengekom dat ek hom weer skool toe sal ry en ons in die motor kan gesels en na sy musiek luister. Ons het ook een keer per week ‘n koffie-afspraak gehad. Sy openheid en eerlikheid oor al die gebeure in sy lewe het my perspektief en begrip van baie onderwerpe verbreed.

Universiteit

Ons is Switserland toe net voor sy laaste skooleksamen. Baie mense het hom gehelp en ondersteun, maar sy afhanklikheid van sy vermoë om te beplan was deurslaggewend. Hy moes die universiteitslewe onafhanklik aanpak en het deur Covid-beperkings gesukkel.

Nou is hy al ʼn derdejaar ingenieurs student en op sy koshuis se huiskomitee, verantwoordelik vir tegnologie en gees.  Hy het ook ʼn HelsHealth applikasie vir die koshuis ontwikkel om Covid-19 in hulle Helshoogte koshuis te monitor.

Ek is baie trots op hom en dankbaar vir sy persoonlike groei ten spyte van die toename in my grys hare. As gevolg van hom het my kennis toegeneem en ek het geleer om vanuit verskillende perspektiewe na situasies te kyk. My kinders het baie bygedra tot my groei.

Ek hoop die Here seën hom ook met klein seuntjies vol passie en planne, want hy gaan ‘n uitstekende pappa wees.

Groete

Emsia