Oor die jare heen het ons die nuwe jaar op verskillende plekke ingewag en so kosbare herinneringe versamel. Elke plek het sy eie tradisies en ons was nuuskierig oor die Silvester ervaring, soos wat hulle daarna in Switserland verwys. Dit was ons eerste winterervaring en met ysige temperature was dit baie anders as ons somerervarings.

Rigi Kulm in die Alpe

Candice en Tristan wou graag hulle Switserse besoek in die sneeubedekte Alpe afsluit. As deel van ‘n daguitstappie het ons Luzern en die berg Rigi Kulm besoek. ‘n Kabelkar het ons 1800 m hoog geneem om die spierwit en asemrowende mooi landskap te aanskou. Groot dele was bedek met gladde ys en ons het almal ‘n beurt gekry om verleë op ons boude te land. Candice en Tristan se besoek is letterlik en figuurlik op ‘n hoogtepunt afgesluit.

Lausanne

Die laaste twee dae van 2019 het ons in Lausanne aan die Franse kant van Switserland deurgebring. Die koue het ons gedwing om binnenshuise aktiwiteite te soek. Museums is gewoonlik nie hoog op ons toeristelys nie, maar ons besoek aan die Olimpiese Museum was vir my ‘n hoogtepunt. Ek het baie interessante dinge geleer deur middel van visuele en interaktiewe aktiwiteite.

Uiteindelik het die laaste dag van die dekade aangebreek. Tot 17h00 was die winkels nog oop en die strate vol mense, maar daarna was daar amper niemand meer op straat te sien nie. Ons het ons verkyk aan die sjampanje en wyn wat op die woonstelle se vensterbanke vir die viering van die nuwe jaar koudgemaak word.

Silvester vieringe

Met ons soektog na ‘n feestelike Silvester viering, het ons einde ten laaste ʼn area met straatmarkies en musiek gevind. Ek het vir die eerste keer ʼn stil disko ervaar. Lywe beweeg rond met verligte oorfone. Daar word drie verskillende liedjies op ʼn gegewe tyd gespeel en dit word onderskei deur die kleur liggies van die oorfone wat dit moontlike maak vir dansmaats om na verskillende musiek op ʼn gegewe tyd te luister.

Die sigbare polisiëring was beperk tot drie polisiemanne wat van die trein afgeklim het met koffie en eetgoedjies vir die ysige wintersaand. Ons het geen vuurwerke gesien nie. Dit was ʼn skrille kontras met Rio de Janeiro waar die polisie die vorige jaar van vroegoggend af met masjiengewere die strate vol gestaan het. Eintlik was alles ʼn skrille kontras met Rio, insluitend die aantal mense, die geraas, die temperatuur asook die skouspel van vuurwerke wat tot vroegoggend in Rio aangehou het. Die enigste gemene deler was die sterk reuk van dagga op albei plekke.

Die jaar is in Lausanne afgesluit met ‘n orreluitvoering in die stad se pragtige katedraal. Ek het so daarna uitgesien om dit by te woon, maar die prys van die toegangskaartjies het ons in ons spore laat omdraai om eerder ‘n warm sjokolade by die huis te geniet. Ons is net voor middernag terug na die katedraal met massas mense wat uit hul gesellige woonstelle gekom het.

Om 00:00 het die klokke van die katedraal oorverdowend vir 15 minute begin lui met rooi ligte en rook wat dit laat lyk het asof die toring aan die brand is. Dit was vir ons baie interessant om te ervaar hoe die Switsers in Lausanne die nuwe jaar verwelkom.

Skidorpie Leysin

Nuwejaarsoggend is ons na ʼn skidorpie Leysin, om te sien ‘n Switserse wintervakansie te ervaar.  Dit het vir my soos ʼn stranddorp in Suid Afrika, net met ʼn sneeu-tema, gevoel. Hierdie vakansie-dorpie het ook menigte toeriste-winkeltjies en ʼn tekort aan parkeerplek.  In plaas van toue vir die waterpark staan hulle in toue vir die kabelkarretjie op na die-ski area toe. Die meisies het in plaas van ontwerpers-bikini’s, ontwerpers ski-uitrustings aan

. In die aand is almal gedaan van in die sneeu baljaar. In Suid Afrika het die branders en die son hulle uitgeput.  ʼn Strandvakansie in Suid Afrika is natuurlik net baie goedkoper is as ʼn skivakansie in Switserland en dan is dit onmoontlik om ‘n Switserse kaasfondue of raclette met ‘n Suid Afrikaanse braaivleis of potjiekos te vergelyk.

Mag 2020 julle almal uitstekend behandel en aangename verassings en geleenthede oplewer. Aangesien die lewe mos in balans is, hoop ek verder ons almal vind kreatiewe oplossings vir die uitdagings wat ons pad kruis en vrede en aanvaarding met die dinge waaroor ons nie beheer het nie. Ek sien uit na ons kuier in April 2020.

Groete

Emsia