Zander het vroeg wakker geword en was opgewonde om skool toe te gaan. Hy moes ’n nuwe leerder van Korea by die skool ontmoet, verduidelik hoe alles werk en hom help om sy pad te vind.

“Sjoe Ma, ek onthou hoe uitgefreak ek was op my eerste dag by die nuwe skool.  Ek kan net dink hoe gestres hy moet wees.  Ek hoop ons kan mekaar se Engels verstaan.” 

ICS  Studente Ambassadeurs

Die gesinne by Zander se skool woon gemiddeld 3 tot 5 jaar in Zürich. Gevolglik is daar dikwels mense wat kom en gaan. ’n Nuwe begin in ’n nuwe land met ’n vreemde taal is oorweldigend omdat alles vreemd en anders voel. Buitelanders word boonop genoodsaak om baie leefstyl veranderinge te maak. Dit help as iemand wat deur die situasie is, geduldig verduidelik hoe alles werk en jou help om jou voete te vind.

Die Inter Community School (ICS) skool verstaan die omvang van die aanpassing wat nodig is en het gevolglik die konsep van Studente Ambassadeurs. Voordat die nuwe leerders aankom, moet die Studente-ambassadeurs die leerders en hul ouers per e-pos kontak. Zander is een van die vele ICS Zürich Studente Ambassadeurs.

Zander geniet die rol baie en is opgewonde oor elke nuwe leerder. Hy het reeds nuwe leerders van die VSA, VK en Korea verwelkom.

Ambassadeurs van ons land

Ons vorm eerste indrukke oor ‘n persoon en die plek wat hulle verteenwoordig wanneer ons hulle ontmoet. Elke persoon tree op as ‘n ambassadeur van sy land en herkoms. Ons geniet dit om na die buiteland te reis, en die mense met wie ons interaksie gehad het, het my opinies oor plekke gevorm en tot my herinneringe bygedra.

Brasilië

Ons het die kus van Brasilië verken tydens ‘n bootvakansie. Die skip het vir ‘n paar uur by ‘n kusdorp vasgemeer, en ons wou ‘n strand besoek. Ons het Uber-vervoer gebruik en gehoop dat die tegnologie platform taalkwessies sou oorkom. Die Uber-bestuurder het sy Google vertalings applikasie gebruik om sy Portugees in Engels te vertaal en ons oortuig om na ‘n strand net buite die dorp te gaan wat ‘n gunsteling onder die plaaslike inwoners is.

Ons het besluit om die risiko te waag, maar het meer senuweeagtig geword soos wat hy verder van die boot af gery het. ’n Paar kilometer buite die dorp het hy tot ons verligting by die mooiste strand stilgehou en aangebied om vir ons te wag. Hy het gesellig gekuier met sy vriende, die eienaars van ’n strand restaurant, terwyl ons in die warm tropiese waters geswem het.

Op pad terug het hy toergids gespeel en vir ons geskiedkundige geboue gewys terwyl hy ons van die dorp se geskiedenis vertel het. Hy was ‘n voorbeeld van iemand wat vreugde en doel in sy werk vind en ‘n uitstekende ambassadeur vir sy dorp en land.

Italië

Met ‘n besoek aan die Lombardy-wyndistrik in Italië het ‘n beplanningsglipsie vir ons ‘n paar uitdagings besorg. Ons het vergeet om ons internasionale bestuurslisensie te hernu en was gevolglik van openbare vervoer afhanklik. Ons verblyf was hoog op teen ‘n berg en dit het dit moeilik gemaak om by die winkels en treinstasie in die vallei uit te kom.

Met ons aankoms het die bestuurder van die Wine Hotel in Sondrio ons by die treinstasie opgelaai. Daarna het hulle ons elke oggend met vervoerplanne gehelp. Hulle het vir ons elektriese fietse geleen en verskillende mense gevra om ons as deel van hul rit dorp toe te neem. Selfs die ma van die meisie wat haar toerisme-internskap by die hotel voltooi het, het ‘n beurt gehad. Ons wil met ons motor terugkeer en weereens dankie sê vir hul gasvryheid.

Malawi

Baie mense wat van ander Afrika-lande kom, werk in Suid-Afrika. Ons eerste tuinier was van Malawi en hy het ‘n ongelooflike positiewe indruk op ons gemaak. Na hom het ons vir Samuel aangestel, ook van Malawi. Ek en Samuel het baie goed oor die weg gekom. Hy het my vertel van sy land en sy mense en ons het steeds kontak. As gevolg van hom en sy voorganger glo ek dat mense van Malawi vriendelik, hardwerkend en eerlik is. Ek glo dit is ‘n pragtige land, al was ek nog nooit daar nie! ’n Besoek aan Malawi is op my reis wenslys.

Ons is almal ambassadeurs

Ons is almal ambassadeurs van lande, streke en organisasies. Ons dade spreek baie harder as woorde en beïnvloed mense se indrukke, opinies en ervarings. In hierdie rol laat ons soms onwetend blywende herinneringe by ander.

Groete

Emsia