Browsed by
Author: emsia.kruger

Grondpad se waardevolle lesse oor balans

Grondpad se waardevolle lesse oor balans

Gedurende die laaste paar maande van die jaar voel dit gewoonlik of daar te veel dinge is vir te min tyd. Ek moet bieg dat ek vir groot dele van my lewe die hele jaar deur so gevoel het. 

Tussen die grootmaak van kinders, ‘n loopbaan, ‘n skoon huis, gesond leef en vrywilligerswerk was balans ʼn uitdaging. Ek het later geglo ek het balans solank as wat dinge nie uitmekaar val nie.

Grondpad lesse

Ek het egter ‘n duur les oor balans geleer nadat ek ʼn pap wiel op ʼn grondpad gekry het.  Nadat die werktuigkundige my gehelp het, het hy aanbeveel dat ek die wiele laat balanseer en belyn en verduidelik watter skade ongebalanseerde wiele aan ʼn voertuig kan veroorsaak.

Balansering verleng die lewensduur van die bande en verbeter die voertuig se werkverrigting. Dit het ook ʼn positiewe impak op vele ander aspekte soos brandstofverbruik.  ʼn Mens kan nie noodwendig sien as dinge nie in balans is nie, maar jy sal wel later die uitwerking daarvan ervaar.

Om my motorwiele te balanseer was maklik.  Die vraag was egter, hoe vind ek balans in my eie lewe?  Dit was vir my duidelik dat die gebrek aan balans groot skade in my lewe en verhoudinge kan veroorsaak.  As jy dit regkry om balans binne in jouself te vind, kry jy dit reg om kalm te bly in die midde van chaos.  Balans is ʼn besluit. Dit bly vir my ʼn strewe en iets waaraan ek bewustelik moet aandag gee, net soos ek gereeld my motor se wiele moet laat balanseer.

Lewenslesse oor balans op die lewenspad

Ek het ʼn paar belangrike dinge geleer in my strewe na balans in my lewe:

  • Een ding op ʼn slag. Ek kan enige iets doen wat ek wil, maar ek kan nie alles doen nie, veral nie alles tegelyk nie. Ek moet besluit wat belangrik is vir my en prioriteit daaraan gee. Dit is nodig om op een ding op ‘n slag fokus, anders ly alles anders skade. Ek kan nie ʼn verslag skryf en na my kind se storie op dieselfde tyd luister nie.
  • Wil-doen dinge is ook belangrik. Ek moet tyd maak vir beide die moet-doen dinge en die wil-doen dinge.  Die dinge wat ek doen vir plesier of vervulling help my om die moet-doen dinge met lewenslus af te handel. Al dink niemand dat die prentjie wat ek verf of my gesprek met ʼn vriendin belangrik is nie, weet ek dat dit my help om ʼn vriendelike en geduldige vroulief en mamma te wees.
  • Leef gesond.  Ek moet gesonde en voedsame kos eet, genoeg water drink en gereeld oefen.  Slaap is van kritiese belang om fris en vars te voel. As ek te min slaap is ek baie fyngevoelig en word klein uitdagings skielik berge.
  • Leer nee sê. Ek het ʼn oordrewe verantwoordelikheidsin.  Dit veroorsaak dat ek vir te veel moet-doen dinge ja sê en te veel wil-doen dinge uit stel.  Ek moes leer ja en nee sê in lyn met my prioriteite en om myself soos ʼn beste vriendin te sien en hanteer.
  • Vra vir hulp.  Ek vind dit moeilik om vir hulp te vra in die vrees dat ek vir iemand moeite sal aandoen.  Aan die ander kant is dit vir my positief as iemand my om hulp vra en ek ʼn bydrae kan lewer. Ek verstaan nou ons het mekaar nodig in ʼn huwelik, familie, vriendekring en gemeenskap. Hierdie ding wat lewe genoem word, is nie bedoel om alleen aan te pak nie.

Gevolgtrekking

Ons lewe, soos  ʼn wiel het balans nodig.  ʼn Wiel wat uit balans is wankel en veroorsaak skade.  Soms is dit nodig om vir ʼn rukkie tot stilstand te kom en te doen wat nodig is om weer balans te vind.  Jy is welkom om my te kontak as ʼn gesprek met ʼn coach vir jou tot waarde kan wees.

Groete

Emsia

Swartwoud se koek en koekoek klokke

Swartwoud se koek en koekoek klokke

Ons het Zander se 13de verjaarsdag in die Swartwoud in Suidwes-Duitsland gevier. Dit is bekend vir sy koekoekhorlosies, swartwoudkoek en Die Grimm-broers se sprokies. Van ver af lyk die woud swart omdat die bome so dig groei.

Triberg en toerisme

Ons het die meeste van ons tyd in die toeristedorp Triberg deurgebring. Nadat ons ons Covid-sertifikate gewys het, het die eienaars van die hotel en restaurante ons baie vriendelik ontvang.

Ek het die mooiste tradisionele klere van die verkoopspersoneel bewonder. Die mans dra leerbroeke met kruisbande en onderbaadjies. Die vroue dra kleurvolle rompe met wit kantbloese wat met ‘n voorskoot afgerond is. Ons kon die gebied se Duits redelik goed verstaan en die mense was verdraagsaam met ons pogings om dit te praat.

Koekoek klokke

Ek het my verkyk aan die koekoek klokke.  Dit is nogal ʼn belewenis om so ʼn winkel te besoek, want jy is omring met die mooiste deuntjies en die koekoek klanke wat dit soos ʼn woud laat klink.  Ons het ook die grootste Koekoek klok in die wêreld besoek.  Die ratwerk is duidelik sigbaar en terapeuties om na te kyk.  Van die koekoek klokke is uniek en gesogte versamelaars items.

Die heel eerste Duitse koekoekhorlosie is gedurende die 1600’s gemaak deur ‘n vindingryke Duitse klokmaker, Franz Ketterer. Hy was die een wat die koekoek voëltjie en klanke bygevoeg het. Die klank word op ‘n vernuftige manier gemaak deur dubbele blaasbalk wat lug deur klein pypies stuur.

Woud en watervalle

Duitsland se hoogste watervalle is in Triberg.  Ons het die park besoek met verskeie voetpaadjies wat jou lei tot by die valle wat 164m hoog is. Die atmosfeer is rustig en kleure sag met skakerings van groen wat tekens van geel wys, geruis van die vallende water en pragtige voëlklanke.  Ons het selfs ʼn paar eekhorings gesien wat nader kruip agter die grondboontjies aan wat die mense vir hulle voer.  Die eekhorings in Europa is baie donkerde in kleur as dié waaraan ons in Suid Afrika gewoond is.

Swartwoud koek

Ons het vir Zander ʼn groot sny swartwoudkoek vir sy verjaarsdag belowe.  Dit was duidelik gewild aangesien die meeste mense dit gekies het.  Gaste het ʼn keuse om dit te bestel mét of sonder alkohol.  Dit bestaan uit verskeie lae sjokolade sponskoek, afgewissel met room en kersies en was ryk en lekker. Dié met alkohol bevat lekker baie Kirsch (kersiebrandewyn).

Die Hotel was eers ʼn klokfabriek

Ons het Saterdagaand in Sankt Georgen oorgebly.  Die hotel het my geweldig interesseer, want dit was ʼn klokfabriek vir 130 jaar voordat dit in die hotel FederWERK met die restaurant FeinWERK omskep is.  In die gange hang swart en wit foto’s teen die mure van mense besig om in die fabriek te werk.

Ons het Zander se 13de verjaarsdag ingewy met koffie op die stoep terwyl ons kyk hoe die son oor die Swartwoud opkom.  Ek voel altyd ʼn bietjie broos en innig dankbaar op my kinders se verjaarsdae vir die voorreg om hulle in my lewe te hê.  Zander met sy wysheid, deernis en humorsin is vir my soos son in hierdie Switserland tydperk.  ʼn Uur later het dit sommer hard gereën met donderweer terwyl ons ontbyt by FeinWerk geniet het.

Die uitstappie saam met die weer het vir ons perfek uitgewerk.

Groete

Emsia

Tradisies verbind generasies en families

Tradisies verbind generasies en families

Tradisies verteenwoordig ‘n kritieke deel van enige kultuur of familie. Ons verhuising na Switserland het my gehelp om die waardevolle rol wat tradisies en gebruike in ons identiteit speel, te verstaan.

Die viering van tradisies

Ons blootstelling aan ander kulture gee my ‘n opregte waardering vir die tradisies, en ek probeer om meer daaroor te leer en te verstaan. Ek koester ook meer Suid-Afrikaanse tradisies. Jy is welkom om in ‘n ander brief oor ons Braai-tradisie in Switserland te lees. Elke koppie rooibostee of tradisionele Suid-Afrikaanse ete vererger ons verlange. Ons kry lus vir beskuit met ons oggendkoffie en blatjang met ons kerrie en rys.

Tradisies vertel ‘n verhaal van waar ons vandaan kom en herinner ons aan die aspekte wat ons lewens help vorm het. Tydens die viering van kulturele of familietradisies kan ons nadink oor die dinge wat in die lewe saak maak en die geleentheid kry om dankie te sê vir die bydrae wat iemand gemaak het. Dit verbind geslagte wanneer gesinne bymekaar kom en bied geleentheid vir kontak met vriende. Hierdie gevoel van eenheid en die wete dat jy êrens hoort, is ‘n kosbare manier om blywende herinneringe te skep.

Die Switserse tradisie rondom die koeie wat van die berge af kom

Die Switserse het baie tradisionele vieringe, en ons het onlangs ‘n skouspelagtige een bygewoon. Gedurende die herfs kom die beeste, skape, bokke en alpakkas van die Alpe af na die dorpe vir die wintermaande. Die Switserse vier hierdie afkoms van die koeie se geleentheid feestelik met markstalletjies, musiek en heerlike kos.

Die beeswagters versier die diere met seisoenale blomme soos sonneblomme, krisante of dahlias. Die mense dra pragtige tradisionele Switserse klere, sing jodelliedjies en maak musiek met die alpehoring musiekinstrumente.

Ons het die Flimserstein-fees bygewoon. Vroegoggend het die veewagters teen die skouspelagtige rotswande van die Flimsersteinberg afbeweeg met meer as honderd pragtig versierde koeie. Hulle het tydens middagete by Bargiz aangekom, waar die dorpenaars vir hulle gewag het. Na verversings is hulle weer na Fidaz en Flims toe. Kyk na hierdie video wat die afkoms van die koeie, “Alpabzug”, by Flimserstein wys.

Ons familie-kuier tradisie

As ‘n familie het ons ‘n jaarlikse tradisie van week lange saamkuier. Voordat ons Switserland toe getrek het, het ons soms tyd in die Wes-Kaap gedeel en ander kere in die Kalahari. Tydens die Kaapstad-besoeke het Ansa se kinders die stad beleef. Ons het historiese plekke, wit strande, aarbeiplase en handwerkwinkels besoek. By die huis het hulle op ons grasperk gespeel en hul speletjies geskep.

Tydens ons Kalahari-besoeke het my kinders die plaas beleef. Van agter op die bakkie het ons die Koedoes en Springbokke dopgehou, in die plaasdam afgekoel en die Kalahari-sonsondergange bewonder.

As ‘n familie het ons ooreengekom om ons jaarlikse saamkuier-tradisie te handhaaf, ondanks die feit dat ons in die buiteland woon. Covid het ons egter vir twee jaar van die voorreg ontneem. Ons beplan ‘n spesiale gesinsfees langs die oewer van die Oranjerivier in Desember 2021. ‘n Onlangse nota van Marga, my suster se dogter, het my weer herinner aan die kosbaarheid van hierdie tradisie deur haar oë. Sy het geskryf:

Groete

Emsia

Nuweling in die sosiale media gemeenskap

Nuweling in die sosiale media gemeenskap

Ek het grootgeword tydens ‘n era toe jy by iemand gaan kuier het vir jou sosiale-kontak behoefte en in ʼn tydskrif verdwaal het vir ontvlugting. Tydskrifte het stories en ontsnapping na vêr plekke gebied. Dit het ons geïnspireer met mooi dinge, kreatiewe idees en gedagtes. Tegnologie het die wyse waarop ons leef verander en sosiale media spreek deesdae ons behoefte aan sosialisering en ontvlugting aan.

Maniere van sosiale kontak en ontvlugting het verander

Ons dra ons sosiale netwerke en ontsnapping op ons fone met ons saam. Die stories wat ons lees en die prente waarna ons kyk, gaan oor mense wat ons ken. Ons kies die vriende wie se nuus en foto’s ons wil sien en kan selfs kommentaar daarop lewer of ʼn grappie daaroor maak.

Ons kan deel wees van groepe met mense met dieselfde belangstellings as ons, wenke, idees en raad kry van mense met gedeelde passies en nuwe vriende maak. Ons belangstellings bepaal die advertensies en inligting wat ons ontvang.

Hoe werk sosiale media?

Ek wou meer leer oor die misterie van hierdie nuwe sosiale wêreld wat ek soms intimiderend vind. Ek het Facebook as ‘n platform nagevors en ‘n paar dinge geleer. Sosiale mediaplatforms moet verseker dat gebruikers waarde vind gedurende die tyd wat hulle daaraan bestee. Facebook het dus Algoritmes in plek gestel om seker te maak dat gebruikers kwaliteit inligting kry op grond van hul belangstellings. Dit was goed om te sien dat die beginsels van die algoritmes baie ooreenstem met gewone sosiale gedrag.

Sosiale gedrag beginsels

Deelname en bydraes word vereis. Om deel te wees van enige sosiale sisteem, moet jy deelneem en bydra. Jou bydraes moet interessant wees en gesprek uitlok. Dit moet handel oor onderwerpe wat ander mense interesseer, hulle laat lag, hoop gee, inspirasie of nuwe idees gee. Die algoritme verseker dat ‘n bydrae sirkuleer solank mense kommentaar lewer of reageer

Bevorder deelname. Gesprekke oor onderwerpe wat mense die geleentheid bied om deel te neem is wenners. Ek geniet bydraes wat my laat dink, emosie ontlok en vir my meer inligting en geleentheid gee om kommentaar te lewer.

Tydsberekening is belangrik. Jy moet jou bydrae maak wanneer jou sosiale media vriende aanlyn beskikbaar is en tyd sal hê om te reageer. Besighede wat sosiale media gebruik om hulle dienste of produkte te adverteer, moet bepaal wat die optimale tyd vir hulle teikenmark is om te reageer.  Dit is die beste manier om te verseker dat die advertensie in sirkulasie bly.

Toon reaksie om deelname aan te moedig.  Dit het baie moed van my geverg om deel van hierdie aanlyn sosiale netwerk te word.  Ek was so bang dat niemand reaksie op my bydraes gaan lewer nie.  Na gesprekke met ander, het ek besef dat hierdie vrees net menslik is. Humoristiese, interessante of omgee kommentaar laat mense voel hulle bydraes maak saak, word waardeer en dien as aanmoediging om daarmee vol te hou.

Deel van ʼn virtuele sosiale gemeenskap

Dit is vir enige nuwe inwoner  ʼn uitdaging om by ʼn nuwe gemeenskap in te skakel. As introvert hou ek gewoonlik eers dop voor ek al my moed bymekaar maak en versigtig begin deelneem. Soms het nuwe inwoners so baie ander dinge wat hulle tyd opneem en hulle behoefte is net vir ontvlugting. In die geval is dit vir hulle voldoende om net dop te hou en nie deel te neem nie. Ons moet elke individu se behoeftes en keuses respekteer. 

Ek is dankbaar vir elke oud-inwoner van die sosiale media wêreld wat my as nuweling laat tuis voel het, en ek onderneem om dieselfde te doen. In ‘n nuwe land met Covid-beperkings en ‘n sosiale behoefte, ervaar ek samesyn in hierdie virtuele sosiale gemeenskap. Ek het ou vriende uit verskillende stadiums van my lewe ontdek en nuwe vriende ontmoet met gedeelde passies. Ek het ook beter insig in die lewens van kennisse gekry.

Al was ek aanvanklik skepties, kan ek eerlik erken dat sosiale media tot my lewe bydra. Ek beoordeel egter noukeurig die oorsprong van plasings en die tyd wat ek op sosiale media spandeer.

Groete

Emsia

Verandering ontwikkel ons veerkragtigheid

Verandering ontwikkel ons veerkragtigheid

Verandering is iets wat ons almal gedurende ons lewens sal ervaar. Ons ervaar veranderinge in ons werk, verhoudings, gesondheid, gemeenskap en die wêreld. Soms beplan ons ‘n verandering en is ons bewus daarvan dat ‘n verandering gaan plaasvind. In baie gevalle verskyn die verandering egter onverwags voor ons deure en verras ons.

Ons vermoë om verandering positief te hanteer, word veerkragtigheid genoem. Op die sportveld bepaal jou fiksheid hoe vinnig jy herstel ná intensiewe oefening. Op dieselfde manier sal jou veerkragtigheid bepaal hoe effektief jy geestelik en emosioneel sal herstel ná lewensveranderende gebeure. Gelukkig kan ons ons vermoë om verandering te hanteer oefen en verbeter.

Verandering het fases

Volgens kenners bestaan ​​verandering uit drie fases. Die eerste fase is afhandeling, afskeid en afsluiting met gepaardgaande verlies en verligting. Tweedens is die tussen-fase, soos die sweefstok kunstenaar in die sirkus wat die sweefstok aan die een kant los, maar onseker is of die sweefstok op die regte tyd en plek aan die ander kant sal wees. Die derde fase is die nuwe begin. Dit bring gewoonlik ‘n element van opwinding maar ook die onsekerheid of jy die nuwe uitdaging kan hanteer.

Refleksie op my eie lewensveranderinge

Verlaat die nes

My eerste betekenisvolle verandering was toe ek my ouerhuis ná skool verlaat het. Die afstand en aanpassing by koshuis- en universiteitslewe het my op baie maniere uitgedaag. Aan die einde van my eerste jaar was ek 15 kg swaarder en al my nuwe klere te styf. Elke keer as ek moet aanpas by verandering as ‘n volwassene, verskyn ek as ‘n verwarde student in my drome en weet nie wat aangaan of watter klas ek moet bywoon nie. In my drome het ek baie universiteite wêreldwyd besoek as ‘n verwarde en onseker student.

Werk in Londen

Ons het as jong volwassenes in Londen gaan werk. Hierdie aanpassing was op ʼn volgende vlak en ek was uit my diepte. My grootste probleem was dat ek nie behoorlik Engels kon praat nie. Boonop was die stadslewe en die grys weer vir my as Kalahari-kind aansienlike aanpassings. Londen het my egter gehelp om myself beter te leer ken en my deursettingsvermoë en veerkragtigheid te verbeter.Ek vertel meer oor my ervaring in Engeland in my brief getiteld Taaltameletjie.

Egskeiding en hertroue

My aanpassing as ‘n geskeide vrou met twee klein seuntjies was uitdagend op ‘n praktiese en sosiale vlak. Ons het mettertyd ‘n nuwe roetine gevind, en ek het nuwe huis- en tuinonderhoudsvaardighede aangeleer. Ons het net begin gemaklik raak in ons nuwe roetine toe Charl deel van ons prentjie begin vorm. Charl se aanpassing was enorm, want hy moes skielik twee seuns help grootmaak al het hy nog nooit in ‘n huis met kinders gewoon nie. Hy het nie die vaagste benul gehad waarvoor hy homself ingelaat het nie.

Verhuising na Switserland

Aanpassing in Switserland is ons mees onlangse groot verandering. Ek het in my brief oor Leefstyl veranderinge in Switserland meer daaroor gedeel. Ek weet wel dat elke verandering en aanpassing wat ek met tyd moes maak, het my help voorberei het vir die aanpassing in ‘n nuwe land.  Wie weet watter veranderinge in die toekoms op my wag?

Veerkragtigheid gedurende verandering

Ek het geleer dat die volgende help met veerkragtigheid terwyl ons deur verandering gaan:

  • Identifiseer die aspekte waaroor jy wel beheer het. Dit is maklik om verstrengel te raak in die baie situasies wat jy nie kan beheer nie. Dit is dus van kritieke belang om geleenthede te soek om jouself te bemagtig om aan verandering te werk.
  • Sien verandering as ‘n geleentheid. Veranderinge laat jou toe om jou prioriteite te heroorweeg. Jy kan besluit hoe om jou tyd te spandeer en wat vir jou belangrik is.
  • Wees jou eie beste vriend en sorg goed vir jouself. Dit is normaal om emosioneel te voel tydens verandering. Dit is nodig om geduldig met jouself te wees en met bewustheid te leef. Jy moet oor jou denkpatrone reflekteer en rasionele denke verseker. Beide roetine en gereelde fisiese oefening het ‘n positiewe impak.
  • Praat met iemand. Wanneer jy al jou baie gedagtes aan iemand probeer verduidelik, help dit met jou perspektief, en voel jy ligter. As jy nie gemaklik is om met vriende of familie te gesels nie, is jy welkom om my te kontak as onafhanklike coach. 

Sterkte as jy besig is om met verandering te stoei.

Groete

Emsia

Musiek praat die taal van my siel

Musiek praat die taal van my siel

Musiek praat met my siel op maniere wat selfs woorde nie kan bereik nie.  Ek self het nie baie musiektalent nie. Pa het in ʼn orkes gespeel en beide my ma en suster is met suiwer nootvaste sangstemme geseën. Ek het egter in die musiek waardering ry beland toe talente uitgedeel is, maar daarvan het ek gelukkig mildelik ontvang.

Liedjies vertel stories van mense, plekke en tye

Tydens my kinderjare het daar altyd musiek in ons huis gespeel.  Daar was ʼn radio in elke vertrek, selfs in die badkamer.  As tieners het ons ons gunstelingliedjies van die radio af op kassetbande opgeneem. Ons het vir my ma ‘n lys van liedjies gegee wat sy moes opneem terwyl ons op skool was. My suster het die woorde van elke gewilde treffer geken, en ek het maar my eie woorde uitgedink

Met my ma se 70ste verjaarsdag het ek ‘n CD-stel van haar 40 gunstelingliedjies as geskenk saamgestel. Sy het liedjies gekies wat verteenwoordigend is van al haar lewensfases en vir my die storie agter elkeen vertel. Tydens haar verjaardagviering het sy kopieë van die CD’s aan haar vriende en familie uitgedeel. ’n Besondere liedjie op die CD wat my na aan die hart lê, is die Māori Love Song. Sy het vir my vertel dat daardie liedjie net na my geboorte in die kar op pad huis toe op die radio gespeel het.

Ek het vir myself ook ‘n Top 40 iTunes trefferslys saamgestel en liedjies gekies wat my aan mense na aan my herinner. Ek luister elke Donderdag daarna as ek die huis skoonmaak en dan kuier my siel by almal terwyl die liedjie wat ons verbind speel.

Musiek is die taal van die hart

Musiek het ‘n fisiese, emosionele en geestelike impak op ons. Dit het die krag om ‘n hele verhoog opgewonde te maak en te vermaak, maar kan ook strelende gemak verskaf. Filmvervaardigers gebruik dit baie goed om emosie en gevoel te skep terwyl die plot ontvou. Mense vertel stories deur musiekblyspele, jazz, rap en opera. Musiek is ‘n medium vir aanbidding en lofprysing in kerke. Dit vorm ook deel van kultuur en volksmusiek om mense ‘n gevoel van eenheid te gee.

Musiek in Switserland

Musiek speel ‘n belangrike rol in die Switserse kultuur. Vele geleenthede bestaan ​​om musiektalent te ontwikkel en uit te leef. In die somer is daar een keer per week ’n orreluitvoering in Zürich se moederkerk (Fraumünster). Verskillende kerkorreliste kan hul talent op die indrukwekkende orrel in die historiese Gotiese gebou deel. My siel is in die hemel as ek na suiwer orrelklanke luister.

Gedurende die somer is daar baie musiekfeeste en konserte. Daar is buitelugkonserte waar mense piekniek kan hou terwyl hulle na simfoniemusiek langs die meer luister. Ons het die Lusern Musiekfees in die groot (KKL) konsertsaal in Lusern bygewoon. Ek en Zander het ‘n Star Wars-fliek op ‘n groot skerm gekyk terwyl ‘n lewendige simfonieorkes die klankbaan verskaf het. In Desember beplan ons om die 007 Sky Fall fliek met lewendige musiek te ervaar.

Die Alphorn is ‘n tradisionele Switserse musiekinstrument. Jare gelede het die skaapwagters dit gebruik om koeie uit die weivelde te roep wanneer dit tyd was vir melk. Later het hulle die Alphorn vir volksmusiek en toerisme gebruik, en nou het dit ‘n nasionale simbool geword. Ons ontmoet dikwels ‘n persoon of groep mense wat hierdie Alphorn by toeriste plekke speel.

Ek hou van Plato se woorde:

Music gives a soul to the universe, wings to the mind, flight to the imagination and life to everything.

Groete

Emsia

As jy die gevreesde oproep ontvang

As jy die gevreesde oproep ontvang

Op 13 September 2020 het ons daardie oproep gekry wat almal gevrees het. Dit was die oproep om ons in te lig dat Justin, ons nefie en Candice se broer, se lewe hier op aarde, op die ouderdom van vyf-en-twintig geëindig het. Hy sou op die 14de ‘n nuwe werk begin het. Justin en Candice is soos ons eie kinders. Charl het elke week met Justin gesels om sy vreugdes en sy laste te deel.

Die kaarte wat die lewe aan ons uitdeel

Ons het nie ‘n keuse oor die kaarte wat die lewe aan ons uitgedeel het nie. Al waaroor ons beheer het, is hoe ons ons hand van kaarte speel. Justin het ‘n onmoontlike hand van kaarte gekry en het in sy kort lewe baie uitdagings in die gesig gestaar. Hy en Candice het op laerskool hul pa aan Motorneuronsiekte verloor. Hy het egter altyd elke lewensuitdaging met hoop en nuwe moed aangepak. Sy deursettingsvermoë was inspirerend.

Justin was ‘n aantreklike en lang jong man met ‘n pragtige glimlag wat hy saam met hom gedra het, ten spyte van die lewe se uitdagings. Hy het altyd probeer om die lewe vir ander beter te maak en was liefdevol en beskermend teenoor Candice. Hy het die meeste van sy tyd in die gimnasium deurgebring en sy gimnasiumvriende was soos familie. Die Covid-19-inperking het hom van sy tyd in die gimnasium ontneem, wat sy gesonde ontsnapping en manier van sosialisering was.

Ons het herinneringe gedeel

Ons het ‘n Zoom-herinneringsessie vir Justin gehad weens Covid-beperkings. Familie en vriende wêreldwyd het die geleentheid gehad om herinneringe te deel. Dit was die eerste keer dat die Goosen-gesin in ‘n baie lang tyd saam was, en dit was so goed om mekaar te sien. Dit het amper gevoel of ons almal gemaklik in een groot sitkamer sit en oor Justin praat. Die eerlikheid van sommige van die stories het ons deur ons trane laat lag.

Vriende se woorde

Dit was ʼn voorreg om met die besonderse vriende in Justin se lewe te ontmoet.  Hulle het die mooiste foto’s, stories en woorde gedeel.  Sy meisie Trish, het tydens die sessie ‘n roerende brief voorgelees oor die impak van sy lewe en liefde op haar.

ʼn Vriendin uit hulle Polekwane kinderdae, het die volgende gedeel:

“I remember how Justin, Candice and I sat on the trampoline and ate sweet chilli chips. This afternoon I went to buy a pack of sweet chilli chips at our South African shop. I ate everything by myself. We spent so much time together as children. I cried like a baby when we moved to Australia! They were like my brother and sister xxx.”

Ander jeugvriende het kosbare verjaarsdagpartytjie-foto’s saam met die volgende boodskap gestuur:

“Thank you for the lovely session today. It was very emotional but also assured us that Justin is in God’s hands. We ask for you and uncle Charl to please stay strong for the sake of Candice and God bless your family. In our language, we say, “ A robale ka Kagiso” which means “May he Rest In Peace” From the Mokgoadi Family.

Dit was merkwaardig hoe sy vriende van kleins af verteenwoordigend was van al die verskillende kulture in ons land. Dit was wonderlik om te weet dat almal se liefde vir Justin ‘n gemene deler is en dit het my ongelooflike hoop gegee vir ‘n toekoms in ons pragtige land.

Ons laaste groet

Ek en Zander het die laaste aand voor ons Switserland toe gevlieg het in Justin se woonstel geslaap en die voorreg gehad om sy pragtige meisie, Trish, te ontmoet. Justin het vir my en Zander gehelp om by die lughawe uit te kom. Hy was dus die laaste persoon wat ek voor ons vlug in Suid-Afrika gegroet het. Min het ek geweet dit was die laaste keer dat ek hom sou sien.

Wanneer ons met die dood gekonfronteer word, dwing dit ons om weer te dink oor die lewe en hoe ons ons kosbare tyd gebruik. Die ervaring het my herinner aan ons impak op die wêreld en hoe ander ons sal onthou.

Groete

Emsia

Ek is ‘n produk van my besluite

Ek is ‘n produk van my besluite

Ons moet almal ‘n paar belangrike besluite tydens ons lewens neem. Hierdie besluite het ‘n wesenlike impak op ons, maar raak ook die mense na aan ons. Die implikasies van hierdie besluite kan jare of selfs dekades duur. Gevolglik is dit soms stresvol om groot besluite te neem en verg baie moed.

Die jare direk na skool

Jong volwassenes moet besluit hoe om hul kosbare jare direk na skool deur te bring. Hierdie tyd is van kardinale belang om hulself vir die res van hul lewens voor te berei. Hierdie besluit het ‘n impak op die kennis wat hulle verkry, die vaardighede wat hulle ontwikkel en die mense wat hulle ontmoet.

Sommige jong volwassenes het sekerheid oor wat hulle wil doen en werk volgens ‘n plan. Hulle het duidelikheid oor die hoekom, wat en hoe-vrae. Ander is egter onseker hoe hulle hierdie kritieke jare wil deurbring. Hul aanvanklike planne werk soms nie uit nie of dit verskil baie van hul ouers se sienings. Dit kan ‘n baie stresvolle tydperk vir jong volwassenes en hul ouers wees. In my brief getiteld, verlaat die nes, deel ek meer oor my ervaring as ‘n ouer.

Verhoudings

Almal neem besluite oor verhoudings. Ander mense se impak op jou is beduidend, en jy moet dus besluit wie jy in jou binnekring toelaat en waar jou grense lê. Dit raak uitdagend wanneer jy besef dit is tyd om ‘n hegte verhouding te beëindig. Dit gebeur gewoonlik omdat die verhouding nie meer konstruktief is nie en langtermyn doelwitte en waardes nie meer in lyn is nie. Hierdie besluite veroorsaak groot konflik, verlies en hartseer.

Loopbaan

In ‘n vinnig veranderende wêreld is dit die uitsondering as mense se aard van werk of werkplek dieselfde tydens hul loopbane bly. Loopbaanbesluite beïnvloed jou finansiële beplanning en persoonlike groei. Dit beïnvloed ook die vlak van vervulling en gemoedsrus wat jy ervaar. Soms het jy nie beheer oor loopbaanbesluite nie. Besighede sluit, afleggings vind plaas of aanstellingskriteria verander om diversiteit en inklusiwiteit te bevorder. In hierdie situasies het jy slegs beheer oor jou reaksies en optrede.

Verhuising

Loopbaanbesluite, verhoudings of lewensfases lei gewoonlik tot verhuisingsbesluite. Dit veroorsaak gewoonlik baie veranderinge en aanpassings. In my brief getiteld, groot, moeilike besluite, deel ek meer oor die besluit en die impak van ons skuif van Suid Afrika na Switserland.

Lesse geleer uit my eie lewensbesluite

Ons het selde sekerheid oor wat die regte besluit in elke situasie is. Ons gee ‘n stap in geloof en gee ons beste. Baie van my lewens besluite het nie uitgewerk soos ek beplan het nie. Ek het uiteindelik ‘n loopbaan gehad wat baie anders was as wat ek studeer het, en my eerste huwelik het in ‘n egskeiding geëindig. Ek is egter oneindig dankbaar vir die lewenservaring en persoonlike groei wat uit die besluite voortgespruit het. Hulle het bygedra tot ‘n kleurvolle reis.

Ek het ook deur die jare geleer dat die gebrek aan ‘n lewensbesluit wanneer dit nodig is, baie vrede kan steel.  Moed is ook ʼn besluit.

Oorwegings tydens lewensveranderende besluite

Ons neem dikwels groot, moeilike besluite op grond van ʼn “gut feeling”. Dit is egter nodig dat jy vir jouself evalueer hoe die besluit:

  • Jou visie, lewensdoel en langtermyndoelwitte beïnvloed;
  • Verskillende aspekte van jou lewe affekteer om te voorkom dat jy so gefokus is op een aspek en in die proses nalaat om te dink oor die impak op alle ander aspekte; en
  • Jou persoonlike waardes ondersteun. Persoonlike waardes is die dinge wat vir ons belangrik is en ʼn groot impak het op ons lewensgeluk, trots en persoonlike vervulling.

Niemand kan jou lewensveranderende besluite namens jou neem nie.  Jy is egter welkom om my te kontak as jy die hulp van ʼn onafhanklike coach nodig het jou te help om by jou antwoord uit te kom.

Groete

Emsia

Tegnologie het ons leefwyse verander

Tegnologie het ons leefwyse verander

Tegnologie het ‘n toenemend veranderende impak op hoe ons leef. Digitalisering is ‘n gonswoord. Ek is skaam om te erken dat ek digitalisering nie met dieselfde opgewondenheid as die res van my gesin verwelkom nie. Ek fokus soms op die ongerief van verandering eerder as die ongelooflike geleenthede wat dit skep. My familie sorg egter dat ek nie agterbly nie.

Tuis outomatisering

Charl werk in tegnologie en raak baie opgewonde oor nuwe ontwikkelings. Hy het talle outomatisering in ons huis in Suid-Afrika geïmplementeer en die alarm, sekuriteitskameras en motorhuisdeure vanaf sy foon beheer. Toe hy weg van die huis af gewerk het, het die outomatisering hom toegelaat om na al die kameras te kyk.

Charl was reeds op die dag van Christo se 18de verjaardag en partytjie in Switserland. Ek het die buitekamera daardie aand afgeskakel omdat ek bekommerd was dat Charl se hart nie sterk genoeg is om na ‘n huispartytjie te kyk terwyl hy by ‘n nuwe werk in ‘n nuwe land aanpas nie.

Charl het ‘n Google Home vir ons woonstel in Switserland gekoop. Dit speel musiek en verskaf die weervoorspelling op versoek. Ek raak egter baie geïrriteerd as Google Home nie my aksent en vriendelike stemtoon verstaan nie. Dit reageer dadelik op Zander se instruksies. Ek het vir Charl en Zander ingelig dat as hulle ooit op dieselfde manier met my praat as met Google Home, ek my tas huis toe pak. Dit was nog voor Covid, bygesê.

Skool

Die ICS-skool voorsien elke kind van ‘n Chrome-boek waaraan hulle by die skool werk en huiswerk doen. Die skool het lisensies vir verskeie sagteware wat die leerders in verskillende vakke gebruik, soos Ontwerp en Kuns. Selfs die biblioteekboekuitleenstelsel is geoutomatiseer. Ouers kan dus ook boeke aanlyn leen en lees.

Supermarkte

By supermarkte word die koop- en betaalproses ook geoutomatiseer. Kliënte moet ‘n skandeerder met hul kaart by die winkelingang aktiveer voordat hulle elke item wat hulle in die trollie laai, skandeer. Ná die aankope betaal hulle by ‘n terminaal. Dit het baie handig te pas gekom tydens Covid-19. Personeellede doen soms steekproewe op geselekteerde kliënte om hulle eerlik te hou.

Die eerste keer dat hulle my vir ‘n steekproef gekies het, was ‘n traumatiese ervaring. Met die finale skandering voor betaling het groot rooi letters, WARTEN, op die skerm verskyn. ’n Winkelassistent het opgedaag en versoek dat ek my trollie moet uitpak, aangesien sy alles weer moet skandeer. Ek kon voel hoe my temperatuur styg, veral toe sy my daarop wys dat ek vergeet het om die strepieskode van die jogurt te skandeer! Ek het die winkel verlaat sonder ‘n kriminele rekord maar was baie verleë .

‘n Blog vir my Briewe

My vriende het my aangemoedig om my gereelde briewe op ‘n Blog te plaas. My vrees vir tegnologie en sosiale media was die twee faktore wat my langer as ‘n jaar daarvan weerhou het om dit te doen. Ek moes dit sien as iets nuuts om te probeer leer.

Sekere aspekte was intuïtief, maar ander was meer uitdagend om uit te vind. Ek het gereeld gewens dat iemand langs my moet sit en help. Die aanlynwêreld het nie ‘n telefoonnommer of ‘n e-posadres nie. Jy maak staat op aanlyn artikels geskryf deur mense wat ‘n soortgelyke probleem ervaar het.

Die hele ervaring het my aan die volgende herinner:

  • In ‘n veranderende wêreld is nuwe en onbekende dinge en ervarings ‘n gegewe. Ons moet hulle sien as deure wat nuwe wêrelde oopmaak.
  • Dit is baie bevredigend om iets suksesvol te doen nadat jy daarmee gesukkel het.
  • Ons is deel van die geskiedenis en het die voorreg om vinnige tegnologiese verandering te aanskou.
  • Almal het die ondersteuning en aanmoediging van ander mense nodig om iets nuuts te probeer. Ons moet dit met liefde en genade ontvang en in oorvloed uitdeel.

Groete

Emsia

Leefstyl veranderinge in Switserland

Leefstyl veranderinge in Switserland

Dit is soms nodig om te reflekteer op die pad wat jy gestap het, die keuses wat jy gemaak het en die impak daarvan.  Om in Switserland aan te pas het ons ʼn hele aantal leefstyl veranderinge gemaak.  Sommige van ons veranderinge was by keuse en ander was vir ekonomiese of praktiese redes.

Vervoer

Ons het ʼn groot aanpassing ten opsigte van vervoer gemaak. Ruimte en parkering is beperk en ons maak, soos die res van die mense in Switserland, gereeld van openbare vervoer gebruik. Ons ry fiets of stap as alternatief. Zander het baie vryheid tussen openbare vervoer en sy scooter.

Ons het na ons eerste jaar ʼn motor gekoop om ons opsies uit te brei. Charl moes weer ʼn praktiese rytoets aflê om ʼn Switserse bestuurslisensie te kry. Ek het meer daaroor in ‘n brief met die titel toetse op die pad gedeel. Ek het egter twee jaar laas in Suid Afrika bestuur, maar dink ek is heelwat fikser.

Eetgewoontes

Daar het ʼn groot verandering in ons eetgewoontes plaasgevind. Ons bederf na ʼn rowwe week in Suid Afrika was om naweke uit te eet of ontbyt op ʼn wynplaas te geniet. Ontbyt is nie eintlik ʼn groot ding hier nie.  Die Switsers kry sommer vinnig ʼn “gipfile” (croissant) of “Brezel” (reuse pretsel) en koffie op die treinstasie of by ʼn bakkery.

Uiteet is duur en die verskeidenheid opsies is beperk. Ek kan die kere wat ons uitgeëet het op my een hand tel. Dit is ook bekend dat koffie drink in Switserland die duurste in die wêreld is.

Ons leef amper heeltemal vegetaries.  Die vleisopsies is beperk en vleis is baie duur. Ek bederf so nou en dan vir Zander met ‘n hamburger of ʼn varkworsie. Die vleis en veral die hoender is vir my smaakloos.  Ons spyskaart is nou deesdae vegetaries.

Verblyf

Ons het ʼn groot huis met ʼn lieflike tuin in Suid Afrika verruil vir ʼn klein woonstel op die eerste vloer in ʼn groot woonstelkompleks Ankenbüel, in Zumikon. Skoonmaakhulp is 15 maal duurder as in Suid Afrika. Ek is dus dankbaar dat ons plek klein is, want die skoonmaaktaak is natuurlik na my rolbeskrywing geallokeer. Ons leef ligter met minder verantwoordelikheid en verpligtinge wat met huisinstandhouding gepaard gaan.

Die kleiner leefruimte veroorsaak dat ons meer permanent in mekaar se persoonlike ruimte is wanneer ons almal tuis is.  Ons het dit aanvanklik as ʼn potensiële probleem gesien, maar nou geniet ons die samesyn. Die aspek was egter tot die uiterste getoets met die Covid-19 inperking.

Diversiteit

Meeste mense wat in die woonstelkompleks woon, kom van verskillende dele in die wêreld. Die internasionale skool bestaan natuurlik ook uit families van reg oor die wêreld. Ons word dus blootgestel aan diversiteit op baie vlakke.  Deur Zander se maats leer ons van verskillende kos, kultuur, taal en dinge waarvan ons nooit geweet het nie.  Dit help ons om met nuwe oë en respek na diversiteit kyk.  Dit veroorsaak ook dat ons meer respek en waardering het vir ons eie land, sy mense en tradisies.

Taal

Ons Duitse woordeskat het al redelik uitgebrei en ons begrip van die taal is redelik, maar ons kan nog nie ʼn behoorlike gesprek in Duits voer nie. Ek was selfs in Suid Afrika nie altyd mooi op die program nie, maar hier het dit ʼn nuwe dimensie bereik. Dit is soms ʼn groot uitdaging. Die verwaging is dat jy die land waar jy woon se taal moet kan praat en met tydsverloop raak almal se geduld met jou al hoe minder.

Ons geniet die nuwe geleenthede en persoonlike groei wat dit meebring.  Die verandering het beslis ʼn groot impak op ons perspektiewe in ʼn veranderende wêreld. Ons word gereeld met ons self en ons uitkyk op dinge gekonfronteer.  Soms moet ons maar net vir ons self lag oor die flopse en flaters wat ons begaan.  Groei gebeur nie sonder die nodige groeipyne nie.

Groete

Emsia